UTHI LIPHUME NOBOVU OFELWE YINDODANA
AKUDIKIZI nqulu kumshumayeli webandla lamaNazaretha waseDanny Dalton, othi ivune ekutshalile indodana yakhe ezilengisile mhla ka-2 kwephezulu emuva kokubanjwa wumndeni ukuthi ijola “nodadewabo”.
UMshumayeli Mbongeleni Sikhakhane (65), wasohlangothini lwaseBuhleni, uthi indodana yakhe, uSibusisiso Sikhakhane (40), besekunesikhathi beyikhuza ngezenzo zayo eziphambene, kodwa ingezwa.
Uthi iqale ukuhlupha eminyakeni emine edlule.
“Ngithe uma ngiphuma lapho ebengisebenza khona, ngase ngifaka yena ngoba ngimbona ukuthi uzele, unezingane eziwu-10 okufanele azondle. Ngithe sengijabula ngithi useyasebenza, abelungu bangifonela bathi uyahlupha akazimiseli emsebenzini, uhlale enza izinto eziphambene njalo.
“Kuhambe isikhathi baze bacikeka abelungu bamxosha. Ubuyile weza lapha ekhaya wazoganga, entshontsha izinkukhu lapha egcekeni azidayise abuye agqekeze. Ngibize umndeni ngawazisa ukuthi sengikhathele yizenzo zakhe, ngiyamxosha, kodwa waxolisa ngagcina ngimxolele wahlala nathi lapha ekhaya,” kusho uMshumayeli Sikhakhane.
Uthi kuhambe isikhathi wezwa kuthiwa isiqale phansi indodana yakhe iyaganga, isintshontsha ngisho izigubhu zikagesi nezintambo. Uyivulele nencwadi yesivimbelo kwabomthetho, ethi mayingaphinde ingene emzini wakhe.
Uthi kuthe ngoNcibijane kuhlukaniswa unyaka, indodakazi yesihlobo sakhe esingasekho (kodwa engazalwa yisona), yagonyuluka kodadewabo isidakiwe, yathi iqomene noSibusiso futhi kade babenza ucansi.
“Mina ngifihlelwe ngesikhathi udaba luvela, kodwa okuthe emasontweni edlule ngatshelwa ngenye yamadodakazi ami ithi kunodaba olunje. Ngisola ukuthi indodana yami inele yezwa ukuthi udaba lokukhohlakala kwayo selufikile ezindlebeni zami, yayocela intambo komunye umakhelwane, yaqamba amanga ithi ifuna ukuyokhipha inkomo yalapha ekhaya engene esiweni kanti iyozilengisa.
“Itholwe ijikoza esihlahleni ngentambo yakwamakhelwane leyo ebithe iyokhipha ngayo inkomo esiweni. Ungiphoxile ngoba mina ngiyahlonishwa lapha endaweni, ngiyinduna futhi nginesikhundla enkonzweni yami,” kusho uMnu Sikhakhane.
Okhulumela amaphoyisa KwaZulu-Natal, uLt Colonel Thulani Zwane, uthi sekuvulwe idokodo lophenyo ngalolu daba kanti akekho osaboshiwe ngalo.