I-PIRATES ENGCUPHENI YOKUSHIYWA WUMDLALI
ULorch ukhokhobelwa ngamakilabhu ase-Europe
I-ORLANDO Pirates isengcupheni yokulahlekelwa ngumdlali ongumgogodla njengoba kuvela ukuthi ukhokhobelwa ngamakilabhu ase-Europe.
IBucs ishayane yaze yabukana neKaizer Chiefs kuba ngu-1-1 kowe-Absa Premiership ngoMgqibelo ntambama eFNB Stadium, eSoweto.
Igoli okunqobe ngalo iChiefs libekwe enethini nguDaniel Cardoso obekuyiphenathi, kwathi elePirates lona lashaywa nguThembinkosi Lorch.
Leli phephandaba lihoshe ngomthombo walo ongaphakathi kwiBucs ukuthi kungase kube yisizini yokugcina kaLorch edlala kwiBucs njengoba kuvela ukuthi kunamakilabhu amfunayo aseEurope.
Kuthiwa ukhokhobelwa yikilabhu yaseTurkey neyaseBelgium.
Kuthiwa la makilabhu akhuluma nomphathi wakhe ukuba abakhulumele neBucs kwazise usane- nkontileka nayo.
“ULorch kungenzeka ahambe uma kuphela isizini ngoba usephenduke inyama emakilabhini ase-Europe.
"Amakilabhu amaningi aphesheya aseyaqalaza kuleli ngoba bayabiza abadlali manje e-Europe ekubeni nomnotho untenga emazweni amaningi akhona.
"Kodwa konke kuzocaca ngokuphela kwesizini,” kusho lo mthombo.
ULorch uthe okwamanje akukho okungako angakuphawula usazoqhubeka nokudlala ngokuzikhandla kwiBucs.
“Yiphupho lanoma yimuphi umdlali ukuya e-Europe nami ngingakujabulela lokho yinqobo nje, uma izinto zizokwenzeka ngendlela ezogculisa iPirates ngoba ngingumdlali wayo.
"Kodwa-ke angifuni ukwanda kakhulu ngale nto mkhulu umsebenzi osangisalele la kwiPirates, kusafanele silwele isicoco seligi,” kusho uLorch.
Kuthiwa ukhokhobelwa yikilabhu yaseTurkey neyaseBelgium...