USHINTSHISWE ISIKOLE UMFUNDI "OSAKAZE UTHISHA NGEMPAMA"
USEZOYOFUNDA kwesinye isikole umfundi (17) waseThornwood Secondary, eMariannhill, osolwa ngokushaya uthisha ngempama ngoba ethi umshayise ngemoto waphuka umlenze.
Kubikwa ukuthi emhlanganweni obungoLwesithathu olwedlule, kuvunyelwane ngokuthi lo mfundi ayiswe kwesinye isikole ayoqhubeka nezifundo zakhe.
Kuzokhumbuleka ukuthi ngoLwesine ILANGA libike ukuthi kuphazamiseke ukufunda kulesi sikole emuva kokuba othisha benqabe ukungena emagunjini okufundisa ngoba bezwelana nozakwabo ohlaselwe ngumfundi ephakathi esikoleni.
Kubikwe ukuthi sekuphele amasonto amabili kungafundwa kulesi sikole ngenxa yalesi sigameko. Ngaphambi kokuba umfundi ashayiswe yimoto, kuthiwa uke waba nokungaboni ngaso linye nothisha esikoleni.
Uphume esibhedlela ngakusasa waqonda esikoleni, wafika uthisha efundisa, wamshaya. NgoLwesithathu oludlule kube nomhlangano phakathi kweCongress of South African Students (Cosas) yiSadtu noMnyango wezeMfundo KwaZuluNatal, ukuzama ukuthola isixazululo kulolu daba.
ILANGA lithole ukuthi kulo mhlangano kuphakanyiswe ukuba umfundi ayiswe kwesinye isikole ukuze ezoqhubeka nokufunda. UMnu Sphamandla Shozi, oyisekela likanobhala weCosas esifundeni iTheku, uvumile ukuthi ubukhona umhlangano ngoLwesithathu, kwaphakanyiswa ukuba umfundi ashintshe isikole.
Uthi lokhu kabakuvumi ngoba umfundi akahambisani nakho. “Ziningi izizathu ezenza singakuvumi lokhu ngoba kasikho esinye isikole esiseduze lapha endaweni. Esikhona sikude, kumele agibele uma eya kusona okuzoba yinkinga ngoba umnyango ngeke ukwazi ukumkhokhela imali yokugibela.
“Esinye isizathu wukuthi umfundi esikhuluma ngaye wenza ibanga leshumi kanti izifundo azenzayo ezifana neDrama, ngeke asakwazi ukuqhubeka nazo.
“Lokhu sizokuvuma uma umnyango uzokwazi ukumhlangabeza ngalokhu esikhala ngakho,” kusho yena.
Uthi zonke lezi zikhalo bazobuyela nazo namuhla (ngoMsombuluko) bazihambise emnyangweni nakwiSadtu ngoba sebehlangene babhunga ngalesi sinqumo.
UNobhala weSadtu kwaZuluNatal, uNkz Nomarashiya Caluza, uvumile ukuthi kuvunyelwane ngokuthi lo mfundi ashintshwe kulesi sikole ukuze kuzoqhubeka ukufunda.
“Okwamanje kazikho izikhalo ebesisazitholile mayelana nesinqumo esiphume emhlanganweni. Siyethemba ukuthi othisha bakulesi sikole azoya kusona bazomamukela kahle naye aziphathe kahle. Sisazohlangana neCosas lapho okulindeleke ukuba kuxoxwe nangezinye izikhalo enazo,” kusho yena.
Okhulumela uMnyango wezeMfundo KwaZulu-Natal, uMnu Muzi Mahlambi, uthe abafundi kumele bakuqonde ukuthi njengoba umnyango ubavikela ukuba bangashaywa ezikoleni, lokho akusho ukuthi othisha kumele baphenduke izinto zokudlala noma zokushaywa yibona.
“Kulesi sigameko umfundi ubengaxoshwa, kodwa wanikezwa elinye ithuba. Lokho akusho ukuthi kuzohlala kunjena, akubona bonke abantu abazoxolelwa uma benze isigameko esinjena.
“Ohlangothini lukathisha, sihlala sikusho ukuthi akumele uthisha avumele ukuchukuluzwa aze afike esigabeni lapho eze eshaya umfundi, lokho ngenye yezinto abafundiswa ngazo,” kusho yena.