KUBULAWE IKHEHLA NESALUKAZI PHAMBI KWEZINGANE
KUBATSHAZWA isihluku emuva kokudutshulwa kubulawe ngentululwane yezinhlamvu ikhehla nesalukazi emzini wabo phambi kwezingane zabo eZinhlabeni, KwaNongoma ngoLwesibili ntambama.
UMnu Zwelempi Zungu (69) nenkosikazi yakhe uNkk Qomenkulu Zungu, uMaNtanzi (68), badutshulwe babulawa ngabasolwa ababili abangaziwa, abebengazifihle ubuso, emuva kwalokho bashaya bachitha bengathathanga lutho. bafike bacela ukukhonjiswa umama wekhaya, abambize ngoMaNtanzi. Kuthiwa bakhulume nezingane, okuthe uma uNkk Zungu ezwa ukuthi kunabantu abacela yena emnyango, waphuma.
Kube wukuqhamuka kwakhe abasolwa bangabuza lutho, bavulela ngenhlamvu bebhekise kuyena. Kuthiwa uMnu Zungu obesendlini ngesikhathi kudutshulwa umkakhe, uphume ngoba esezwa umsindo wesibhamu eyobheka ukuthi kwenzenjani.
Uzithele kubasolwa abaqhubekile nokudubula bebhekise ngakuyena. Indodana yabafi, uMnu Thembisani Zungu (40) - ebikhona endlini ngesikhathi kufika abasolwa - ithi iphume emuva kwendaba.
“Kuyimanje sisadisekile ukuthi ababulali bebefunani njengoba bengathathanga lutho. Kayikho impi noma ingxabano esiyaziyo (abazali) abathinteka kuyona,” kusho uMnu Zungu.
Uthi lesi sigameko senzeke phambi kwezingane zakubo zamantombazane zibuka. Utshele ukuthi abazali bakhe babulawa nje, bebesanda kuqala ukulungisa umuzi wakubo sekuthengwe nempahla yokwakwa okumanje igcwele igceke.
Imithombo yaleli phephandaba engomakhelwane bakwaZungu, ithi uNkk Zungu wake wasolwa ngabantu ngokuthi waqasha imoto engaziwa endaweni ngesikhathi eyolanda izimpahla zokwakha umuzi wakhe.
Kuthiwa wayemsolwa ngokuthi kungani engaqashanga izimoto zomakhelwane ezivame ukuma ezitolo zokwakha. Kubikwa ukuthi kwaphoqeleka ukuba ayoxolisa kulabo abebemsola ngalokho.
Ikhansela lendawo, uMnu Bongani Ntombela, lithe besebezwile ngalesi sigameko esibashiye besathukile.
“Kusithusile ukuzwa ukuthi ababulali kabathathanga lutho, besizitshela ukuthi yizigebengu ebeziyobamba inkunzi. Kuyacaca ukuthi ababulali bebefuna umphefumulo.
“Siyanxusa ukuthi abantu basendaweni basebenzisane namaphoyisa ukubamba abasolwa ngoba sizwile ukuthi baye kwaZungu bengazifihlile ebusweni,” kusho uMnu Ntombela.
Okhulumela amaphoyisa KwaZulu-Natal, uCapt Nqobile Gwala, uthe amaphoyisa avule amacala amabili okubulala, bekungakaboshwa muntu.