U-Andile udalula indoda eyamdlwengula

Isolezwe ngeSonto - - IZINDABA - DELI MNCWABE

ULIDALULE okokuqala igama lomuntu owamdlwengula njengoba eveze ukuthi wanukubezwa nguyise omzalayo, umethuli wohlelo iKhumbulekhaya kwiSABC1.

U-Andile Gaelisiwe ubhoboke ngoyise kwiTwitter amsola ngokumnukubeza esikhathini esiphambili.

Eminyakeni edlule u-Andile wake wakuveza ukuthi wake wanukubezwa kodwa ubengakaze aligagule igama lomenzi wobubi.

Uvumile ukuthi nguyena obhalile nokuthi akushoyo umile kukhona futhi kuyiqiniso.

Ukubhala kwakhe kube ngemuva kokuthi kube khona owesifazane ofake isithombe sale ndoda kuTwitter ngoSepthemba.

Lo wesifazane ucele abantu ukuba bamfunise umlisa. Ukuze alekeleleke kalula ufake isithombe, wabe esefaka namagama osaziwayo phakathi kwabo okukhona no-Andile olandelwa ngabantu abaningi ngenxa yohlelo alwethulayo lokuthungatha nokuhlanganisa abantu abadukelene.

U-Andile uthi wethuke koma nasozwaneni ebona isithombe sikayise sifakwe yilo wesifazane.

Yize engaphathekile kahle ngokubona uyise kodwa uthe umjabulele lo wesifazane ngokuthola uyise nokusho ukuthi usengudadewabo.

U-Andile uphinde waveza ukuthi wayekade engamazi uyise, kuthe uma sebetholene, wamdlwengula.

Uthe bekusele izinsuku ezimbalwa kube ngusuku lwakhe lokuzalwa olungoSepthemba 13.

Ukwethuka kwakhe kudalwe wukubona uyise namgcina ngosuku amnukubeza ngalo kudala.

“Ngangingambizi ngobaba kodwa ngangimbiza ngomdlwenguli,” kusho u-Andile.

Ukumbona esithombeni kubuyise ukudinwa okuhambisana novalo.

“Namuhla ngitshela bonke abesifazane abake bahlukunyezwa ukuthi nami ngingomunye wenu. UP*** (emgagula ngegama) uyihlazo elibi. Kufanele axolise ngokubi akwenza. Ngizwa ngidinwa ngokungamvuleli icala ngesikhathi engigila.”

UKHALA ezimathonsi ngokunukubezwa nguyise umethuli wohlelo uKhumbulekhaya u-Andile Gaelisiwe Isithombe: ITUMELENG ENGLISH

Newspapers in Zulu

Newspapers from South Africa

© PressReader. All rights reserved.