Usola udlame lwaseGlebe ohlaselwe
kuqhamuka amadoda adubule imoto yakhe.
Imoto isale imbobombobo ngenxa yokuthelwa ngentululwane yezinhlamvu okukholakala ukuthi zingaphezu kuka-15 ezingene kuyona.
Ethintwa ngalesi sehlakalo uthe usola isimo saseGlebelands esesidlule nenqwaba yemiphefumulo ngokuhlaselwa kwakhe. Akathandanga ukunaba ngokuthi ulimale kuphi emzimbeni ngesikhathi edutshulwa.
“Ngikholwa wukuthi kuhlobene nakho ngoba akekho umuntu engingathi angizwani naye nengisola ukuthi angangihlasela ngaphandle kwabathile abaseGlebelands nabo engingazi ukuthi ngibangani nabo. Ngisola bona ngoba bengivele ngifunwa, akuqali lokhu,” kusho uZweni.
Uthe inhlangano Ubunye Bamahostela yayikade isebenzisana kakhulu namakomiti ezitezi agcine echithwa ngesikhathi kusuka uthuthuva.
Uhlaselwa nje akukapheli zinsuku etshele Isolezwe ukuthi sekunzima kubona bewubuholi boBunye Bamahostela ukuthi bangenelele ezindabeni zaseGlebelands ngoba basaba ukubulawa.
UZweni wayeveze ukuthi kuningi okungahambi kahle ehostela nokuthinta abahlali bakhona okubalwa kuko imali yerenti athe ingaphezulu kwalena ekhokhwa kwamanye amahostela.
Uthe akulula ukuthi bakhulume ehostela ngoba ukukhuluma kugcina sekukwenze wanyamanambana kubantu abathile.
Okunye athi kuyabakhathaza wukuthi abantu abalwa nokuthula nabaphehla udlame babulala abaholi.
Wayekhuluma kusanda kudutshulwa indodana kaMnuz Sthenjwa Nyawose oyikhansela, uMnuz Nsindiso ‘Nsi’ Nyawose emasontweni amabili adlule.
UNyawose, ongeyena umhlali wasehostela, usinde edutshulwa nomngani wakhe uMnuz Msizi Makhoba owadutshulwa ekhanda wagcina eshonele esibhedlela.
Okhulumela amaphoyisa KwaZulu-Natal, uColonel Thembeka Mbhele ukuqinisekisile ukuthi amaphoyisa aphenya icala lokuzama ukubulala emuva kokuhlaselwa kukaZweni.
Uphinde waveza ukuthi baphenya necala lokubulawa kowesilisa obulawe ehostela iGlebelands ngoLwesibili ebusuku.