IChiefs isibhekile isimo sikaPienaar
IBHALA iyacisha iKaizer Chiefs ngezinsika zabadlali abadume phesheya kwezilwandle nasemaqenjini esizwe aseNingizimu Afrika, uSteven “Schillo” Pienaar noDaylon Classen, bobabili abayibamba esiswini.
Isolezwe lihabule izindaba zokuthi iChiefs ayicacisi ngalaba badlali njengoba ngeledlule ithinte imenenja yabo uLance Davids ibuza ngesimo sabo.
“Ngesonto eledlule umqeqeshi weChiefs uSteve Komphela ufonele uDavids embuza ngoPienaar noClassen. Uthembise ukuthi uzobuyela kuDavids kodwa kuze kube yimanje akakaze akwenze lokho. Okuxakayo wukuthi laba badlali abanazo izinkontileka kodwa iChiefs yenza kancane,” kusho umthombo.
Amakhosi asezakhele igama ngokubamba eyeka ngabadlali abaseqophelweni eliphezulu abasuke bengenazo izinkontileka. Phakathi kwabadlali iChiefs ebayekile basayina kwamanye amaqembu eminyakeni eyedlule, kukhona uBenni McCarthy, Anele Ngcongca, Sifiso “Nsunda” Myeni noJames Keene.
UPienaar ubegijima kwiSunderland edlala kwi-English Premier League. Leli qembu ligcine ligawulwe yizembe esigabeni esikhulu. Ngesizini edlule uPienaar ubefunwa yiMamelodi Sundowns ne-Orlando Pirates kodwa wagcina elandwe nguDavid Moyes kwiSunderland.
Le ngwazi esike yaba ngukaputeni weBafana Bafana, yahamba eMzansi ngo-2001. Phambilini wayedlala kwi-Ajax Cape Town ayijoyina ngo-1999.
Phesheya kwezilwandle udlale kwi-Ajax Amsterdam yaseHolland, Borrusia Dortmund yaseGermany, Everton, Tottenham Hotspur neSunderland okungamaqembu ase-England. KwiBafana udlale imidlalo engu-61 washaya amagoli amathathu.
UPienaar, oyibamba enkabeni yenkundla noma ezinhlangothini, umele iBafana kwiCAF Africa Cup of Nations (Afcon) eGhana ngo-2008, wadlala kwiFifa Confederation Cup ngo-2009 eMzansi, wase eyibamba kwiNdebe yoMhlaba eJapan/Korea ngo2002 nakuleli ngo-2010.
UClassen (27) oyibamba enkabeni yenkundla, yisemuva kwabagadli noma ezinhlangothini, ubegijima kwi-1860 Munich edlala kwiFirst Division eGermany. Inkontileka yakhe naleli qembu iphelile. Ufike kulona ngo-2014. Udlale imidlalo engu-49 washaya igoli elilodwa. Uhambe eNingizimu Afrika ngo-2008. Usuke kwi-Ajax Cape Town waya kwi-Amsterdam eHolland. Kuleli qembu laseHolland ushiye ngo-2010 wajoyina iLierse IK yaseSweden, kwathi ngo-2013 wajoyina iLech Poznan yasePoland.
KwiBafana usedlale imidlalo engu-11. Ngo-2009 wayeseqenjini lesizwe lakuleli lika-Under 20 elafinyelela kwiLast 16 kwiNdebe yoMhlaba e-Egypt.
UBobby Motaung oyimenenja yeChiefs ebuzwa ngendaba kaPienaar noClassen uphendula ngendlela ebilindelekile - engaphumeli obala.
“Ubani othe sifuna laba badlali? Uma uthi umqeqeshi, kumele uye kobuza yena. Thina lapha kwiChiefs sinendlela esenza ngayo izinto. Uma sekukhona umdlali esesimsayinisile sizofaka kwi-website noma ezinkundleni zokuxhumana zeqembu. Engingakunxusa wukuthi nilinde. Uma sesiqede yonke into sizobiza isithangami nabezindaba. Njengeqembu elikhulu ngicabanga ukuthi kwakha umqondo ukuthi siyabheka emakethe njengoba kuyilesi sikhathi sesizini.” IChiefs isanda kuqasha uPatrick Mabedi njengephini lomqeqeshi.