Intsha ibhekene nobunzima: Buthelezi
UMENGAMELI we-IFP, iNkosi Mangosuthu Buthelezi, ugqugquzele intsha ukuthi isebenze kanzima yize isimo somnotho sibheda.
UButhelezi ubekhuluma emhlanganweni abenawo nentsha eDhlamini Multi-Purpose Centre, eSoweto, ngoLwesihlanu lapho bekukhunjulwa khona okwakwenzeka ngoJuni 16, 1976.
“Ngifuna intsha yanamhlanje ibukele kweyango-1976.
“Ngifuna isebenzise amathalente ayo ukushintsha izimo ebhekene nazo. Ngiyabazi ubunzima enibhekene nabo, kungiphatha kabi ukubona intsha isokola kangaka.
“Umnotho kawukhuli, uhhafu wentsha awusebenzi futhi uthembele kwizibonelelo zikahulumeni nakumalungu omndeni,” kusho uButhelezi.
Uthe ngenxa yobunzima, enye intsha igcina isingena ebugebengwini, ibhema izidakamizwa ingena nasekuqwayizeni.
“Intsha iyanukubezwa ngenxa yokuthi impofu. Ayikwazi nokusungula amabhizinisi ayo.
“Intsha ibhekene nobunzima obukhulu kodwa ngifuna iqhubeke nokusebenza kanzima, izimisele ngemfundo futhi ingaziyekeleli. Izwe lidinga intsha esebenza kanzima ukuze liphumelele. Ngifuna intsha iqine isibindi ngoba izwe liyayidinga,” kusho uButhelezi.
Uthe ngisho ufunda amaphephandaba awulitholi ithemba ngenxa yokuthi izwe likwinzikamnotho. Abaphethe izwe balifaka kwinzikamnotho ngezinqumo zabo ezingaphusile. Bayakhwabanisa futhi beba
nemali okufanele isetshenziselwe ukwakha amathuba omsebenzi,
Uthe yize isimo sisibi kangaka kodwa intsha akumele ilahle ithemba kodwa kumele isukume izibambe ziqine ngoba ikusasa ngelayo futhi iyona ezoshintsha isimo seNingizimu Afrika.
“Uma ningaba nesibindi njengentsha yango-1976 nizokwazi ukushintsha uhulumeni okhohlakele nibe namandla okumphikisa ezinqumeni ezingaphusile.
“Sidinga abantu abasha abazosebenzela izwe ngobuqotho, balwe nezinga lokungaqashwa kwabantu, ubuholi obuntekenteke ngoba intsha idinga amathuba omsebenzi.
“Kumele sisebenzise ilungelo lethu lokuvota sifake abaholi abaqotho ukuze sinqobe le mpi,”kusho uButhelezi.