Isimo sibi ezibhedlela zaKwaZulu-Natal
unakekela isibhedlela sonke, ikakhulukazi ngempelasonto.
Ngicabanga ukuthi ungqongqoshe nenhloko yomnyango wezempilo kabawutsheli umphakathi ngezinkinga ezibhekene nomnyango. Lokhu kuyinkomba yokuthi umsebenzi wabo uyabehlula.
Ngikusho lokho ngoba umnyango awubaqashanga abahlengikazi abaqeqeshwe yizikhungo zemfundo ephakame – University of KwaZulu Natal, Durban University of Technology ne-University of Zululand – nakuba unenkinga yokushoda kwabahlengikazi.
Umnyango ube usukhetha iphela emasini ngokuqasha idlanzana okukholakala ukuthi yilabo ebefundiswa yiwo umnyango. Abanye abahlengikazi kabakhokhelwe imali yabo eyayibanjwa ngoba izitifiketi zingakaphumi.
Lesi simo sokushoda kwabasenzi namakhambi okwelapha nezinsiza kusebenza sizodala ukulahleka kwemiphefumulo nokwehla kwezinga lokuthemba izibhedlela zikahulumeni KwaZulu-Natal.
Abasebenzi, ikakhulukazi abahlengikazi, bazophelelwa wuthando lomsebenzi futhi bazongena emacaleni ngenxa yamaphutha abazowenza ngenxa yengcindezi.
Okunye okungenzeka, okuzobanga ukuthi wona futhi umnyango ukhale ngokuthi abekho abasebenzi abazozinza emakhaya uma laba bahlengikazi ongabaqashanga sebefudukela kwezinye izifundazwe nakwamanye amazwe akhathalele impilo yezakhamuzi.
Ngicabanga ukuthi uMnyango wezeMpilo ungasilungisa lesi simo uma nje ungaqasha abasebenzi abakhona uthenge namakhambi.
Uma ukhala ngesabelomali esincane, kawubhale unxuse uMgcinimafa ukuba abafakela okuthe xaxa. Qiniso Sibeko