Kubuye ithemba ngamaBoks
BABUYELE emakhaya bemamatheka abalandeli bamaBhokobhoko futhi kubonakala ukuthi bayakholwa ukuthi iqembu labo selibuyele emgqigqweni abawaziyo kubhoke uSiya Kolisi koweCastle Lager Incoming Tour ebiseThekwini ngempelasonto.
Kulo mdlalo okunqobe kuwona ezika-Allister Coetzee ngo 37-15 kucacele noma ubani ukuthi ngisho ukuzethemba kwabadlali bamaBhokobhoko kukhulile. Ngesikhathi ethatha lo msebenzi uCoetzee izinto eziningi azizange zihambe ngendlela ebefisa ngayo.
Ngemuva kwesizini yokuqala unqobe imidlalo emine kuphela kwengu-12 okwenze abaningi baze babona kungcono akhululwe kuwona. Phakathi kwezinguquko azenzile kule sizini ukungafihli ukuthi uthembele kubadlali abafana noKolisi ngokunjalo nokaputeni wakhe uWarren Whitely.
“Kungumsebenzi wethu thina ebesikhona izinto zonakala ngesizini edlule, ukuthi sibe phambili uma sezilungiswa,” usho kanje uKolisi ngemuva komdlalo ashaye kuwona ama-try amabili amahle. Eyesibili ishiye abaningi bekhexile ngenxa yobuchule abusebenzisile.
Abe mane esewonke amatry kwazise uKolisi ushaye amabili kwathi amanye abekwa emgqeni uJan Serfontein, Coenie Oosthuizen no-Elton Jantjies. Ngaphezulu kwe-try uJanties ube nomdlalo omuhle kwazise umdlalo wonke ugcine eshayele amaBhokobhoko amaphuzu angu22.
“Okuhlukile kulokhu ukuthi sihlele kahle, hhayi le nto esiyenze ngesizini edlule. Ngonyaka odlule asizange sibe nalo ngisho elincane ithuba lokuhlela.
“Kulokhu sihlalile phansi sahlela yingakho imiphumela ibonakala,” kusho uCoetzee ngemuva komdlalo.
“Kule sizini sigxile kubadlali abakhombise ifomu kwiSuper Rugby. Sihlanganile namaqembu ahlukene adlala kwiSuper Rugby saxoxa nabaqeqeshi.
“Ngeke nje ngikufihle ukuthi sisebenzile nomunye wabaqeqeshi beCrusaders (uScott Robertson) ngoba baqhwakele okusho ukuthi kukhona okuhle abakwenza ngendlela efanele. Kuhle ukubona izinto zilunga kade uqale kabi.
“Lokhu esikwenzayo manje yikhona vele lokhu ebesifuna ukukwenza nangonyaka odlule,” usho kanje lo mqeqeshi oneminyaka engu-54 ubudala.
Okubi okwenzekile lapha ukulimala kuka-Oupa Mohoje ngomzuzu ka-14. Komunye umdlalo obuseMoses Mabhida ngoLwesihlanu iSouth Africa A inqobe ngo 36-28 kuFrench Barbarians.
AmaBhokobhoko azobhekana neFrance emdlalweni wokugcina eGoli ngempelasonto.