Akasabhekile ukudla iqoqo uMosimane
AKANANDABA nokuqeda eqhwakele ku-Group C weCAF Champions League umqeqeshi weMamelodi Sundowns elele isibili (kuleli qoqo) kulandela ukudlala kwayo ngokulingana ne-Esperance de Tunis yaseTunisia ngoLwesithathu ebusuku e-Olympic Stadium, eRades.
Lo mdlalo, ongazange ufinyelele ezingeni ebelilindelekile kwazise bekubhekene amaqembu anomlando wokudla lesi sicoco, ugcine uphele ngo 0-0 okwenze la maqembu womabili azibeka ethubeni elingcono lokudlulela kuma-quarterfinal.
Ileli qembu laseTunisia eliqhwakele kuleli ngamaphuzu ayisishiyagalombili kanti iDowns isilele isibili ngamahlanu lapho ibambene khona neSaint George yase-Ethiopia bese kuvala i-AS Vita Club yaseDemocratic Republic of Congo (DRC) ngamaphuzu amathathu.
UMosimane uthe useqalile usebenzisa ubuhlakani asebazi manje ngokudlala kwiChampions League ngakho-ke uyazi ukuthi okusemqoka ukuqeda emaqenjini amabili aphezulu.
“Sekusebenza isipiliyoni manje hhayi okunye. Angisabhekile eqoqweni lethu kuphela kepha nakuleli qoqo okuzophuma kulona esizodlala naye kuma-quarter final nakhona ngiwavulile amehlo. Ngenhlanhla iZanaco siyayazi futhi idlala kahle kodwa akuyona yodwa esingase sihlangabezane nayo ngakho kusemqoka ukwazi ukuthi kukhona i-Al Ahly neWydad Athletic Club.
“Wonke la maqembu aqine ngendlela eyisimanga. Esikubhekile manje ukuqeda endaweni efanele eqoqweni. Nakuba singeke siqede siqhwakele kodwa indlela isekhona,” kusho uMosimane ngemuva komdlalo wangoLwesithathu.
UMosimane uzishaya isifuba ngakufunde endleleni yakhe ebheke esicocweni ngesizini edlule futhi uthe sekuyisikhathi sokuthi awasebenzise wonke amaqhinga awafundile.
“Kusemqoka kakhulu ukuthi sibazi bonke ubuhlakani namaqhinga asetshenziswa amaqembu adlala kwiCAF ngoba uma singakwenzi lokho sizozisola. Uma uzokhumbula ngesizini edlule kunesikhathi lapho sidlale khona neZamalek ngo-3 ntambama. Akekho ongazi ukuthi yini edale ukuthi sidlale ngaleso sikhathi neqembu laseEgypt okuyinto engenzeki. Ngiyazi mina ukuthi iChampions League eyalaba abasebenzisa wonke amaqhinga,” kusho lo mqeqeshi othe uthandazela ukuthi angabe esalinyalelwa abadlali abamqoka njengoba seziya emajikeni. Ziyabuyela ngempelasonto ezayo lapho iSundowns izovakashela khona iSaint George e-Addis Ababa ngesikhathi esifanayo i-Esperance ivakashele i-AS Vita eKinshasa.