Bazakhele igama ngokuhlabana
ZIPHAKAMISE ifulegi laKwaZulu-Natal izingane zezikole zamabanga aphakeme iDundee High neGobindlovu Combined High eziphume isibili nesithathu emncintiswaneni wezomthetho kuzwelonke.
UVuyolwethu Ngobese noPhilasande Mdletshe baseDundee High baphume isibili kwathi uNosipho Mkhize noNombuyiselo Ngcobo waseGobindlovu, eMgungundlovu bathatha indawo yesithathu kulo mncintiswano obusenkantolo yomthethosisekelo kuleli ngempelasonto.
Lezi zikole zombili zingezinye zezikole ezine ezihambe phambili ezikoleni ebezingenele umncintiswano wezomthetho.
UNksz Fikelephi Dlomo ongumgqugquzeli woMnyango wezeMfundo uthe bayaziqhenya ngokwenziwe yilezi zikole.
“Sijabule kakhulu ngalolu hlelo. Sibonga nabakwaLegal Aid SA ngokusebenzisana nathi nangokusilethela abameli babo abasize nangolwazi lwezomthetho beseka nabafundi kusuka ngosuku lokuqala siqale umncintiswano,” kusho uNksz Dlomo.
Umncintiswano owaziwa ngeSouth African National Schools Moot Court Competition ngumncintiswano waminyaka yonke okuqondwe ngawo ukusabalalisa ulwazi ngomthetho nomthethosisekelo ezikoleni nasemphakathini.
UMnuz Vela Mdaka weLegal Aid SA uhalalisele abafundi abahlabene wagcizelela ukuthi bazoqhubeka nokulweseka lolu hlelo. Uthe ukuba yingxenye yalo kubanike ithuba lokuthi basabalalise ulwazi ngamalungelo abantu okubalwa kuwo aqukethwe kumthethosisekelo.
Abafundi ababili baseDundee High bahlomule ngomfundaze wokufundela izifundo zomthetho. Laba bafundi bazomela elakuleli esigabeni esilandelayo somncintiswano esizoba seHague, eNetherlands, ekuqaleni konyaka ozayo.