‘Akuzowuthikameza umnotho ukuhamba kweBank of Baroda’
ISAZI somnotho nezomthetho uSolwazi Bonke Dumisa sithe ngeke kushintshe lutho ngokuhamba kweBank of Baroda eNingizimu Afrika.
Izolo ibhange loMbuso iSouth African Reserve Bank (SARB) limemezele ukuthi iBank of Baroda iyahamba kuleli.
Esitatimendeni esithunyelwe kwabezindaba ngabeSARB bathe bazokwenza isiqiniseko sokuthi uma iBank of Baroda ihamba awahlukumezeki amakhasimende ayo.
UDumisa uthe ukuhamba kweBank of Baroda ngeke kuwushukumise umnotho waseNingizimu Afrika ngakho abantu akumele bakhathazeke.
“Amaphaphu awehle kubantu ngoba iBank of Baroda bekungeyosomabhizinisi abasebenzisana kakhulu namazwe ase-Far East. Akukho okuzoshintsha emnothweni wethu ngoba ababaningi abantu akade befaka amarandi kuyona. Ukube iBank of Baroda ibiyisikhondlakhondla besizokhala kodwa ibisetshenziswa yidlanzana,” kusho uDumisa.
Esitatimendeni esikwi-website yeBank of Baroda, amakhasimende akhona atshelwe ukuthi izoyeka ukwamukela amadiphozithi nokubolekisa ngemali ngoMashi 1 bese ivala iminyango ngoMashi 31.
Ngonyaka odlule iSARB yahlawulisa iBank of Baroda u-R11 million emuva kokuvela kwemibiko yokuthi ibiyamukela amadiphozithi emali enkulu yomndeni wakwaGupta.