UNdlovu ubingelele elaseChina ngegoli
UBINGELELE ngegoli elisize iqembu lakhe elisha laseChina umgadli weBafana Bafana, uDino Ndlovu weHangzhou Greentown, enqobe ngo 2-0 kwiMongol Zhongyou.
UNdlovu, osezakhele udumo ngokufika emaqenjini ahlukene emazweni ahlukene aqhulule amagoli, uqale ngendlela efanayo eChina.
Sisekuzo ezimnandi kwabeBafana, uBongani Zungu obese enesikhathi engadlali ngenxa yokulimala ubuyile enkundleni wawudlala wonke, i-Amiens ibambana kwathula umoya kuba u 1-1 neDijon.
Lokhu kuthe ukubalekisa ezikaZungu kancane ezembeni yize zisahleli kabi.
Kuyona le ligi yaseFrance, kusuke esinamathambo kubhekene iMontpellier neLOSC Lille abalandeli bengena enkundleni, badunga umdlalo. Nokho ubesebhentshini uKeagan Dolly weMontpellier. Ugcine engazange angene kulo mdlalo obubuye umiswe kubuye kuqalwe phansi. Umlingani wakhe uLebo Mothiba ngakolunye uhlangothi uwuqalile lo mdlalo waze wakhishwa ngomzuzu ka-72.
ULebohang Phiri weGuingamp ubeseqenjini elikhale ngaphansi ngo 5-2 uvela kwiNice. Lokhu kwehlisele ezikaPhiri endaweni ka-13 kwi-log.
Akadlalanga eBelgium, u-Andile Jali weKV Oostende. Lona bekungumdlalo wokugcina wesizini lapho i-Oostende ikhale khona ngaphansi ngo 3-2 kwiStandard Liege. Baqede bekunombolo 11 okubabeka ethubeni lokuzama indawo kumaPlay Off azokhipha igunya lokuyodlala kwi-Europa League ngesizini ezayo.
Nakule mpelasonto ubengabonwa nangokhalo kwiKonyaspor uLebohang Manyama, ofike kuleli qembu ephethe isicoco sokuba wumdlali ovelele kwiPremier Soccer Legaue (PSL). Iphinde yakhala induku kwiKonya eshaywe yiGalatasaray. Bahleli kunombolo-17 kwi-log.
Ngesikhathi wonke umuntu esakhuluma ngobuqhawe bukaThulani Serero obedlala beshaya izinkunzi i-Ajax Amsterdam ngesonto eledlule, iVitesse ithelwe ngehlazo lika 5-1 uvela kwi-Utrecht. Uwudlale wonke uSerero lo mdlalo. E-England, uKamohelo Mokotjo weBrentford uwubuke wonke umdlalo esebhentshini ezakhe zishaywa yiMilwall ngo 1-0 koweChampionship. Kulishiya lisekhona iphupho lama-Play Off kuMokotjo weBrentford ehleli kunombolo 10 kwi-log.