Umgadli weDowns unukelwa igoli
UMGADLI weMamelodi Sundowns, uJeremy Brockie, ayimkhathazi indaba yokuphikwa amagoli phambi kwamapali.
UBrockie (30) uthengwe ngetshe lemali kwiSuperSport United kuvulwe iwindi lokuhwebelana ngabadlali ngoJanuwari. KwiSuperSport ushaye amagoli angu-54 emidlalweni engaphezu kuka-80 ngaphambi kokushiya Amatsatsantsa a Pitori.
Selokhu efikile kwiSundowns ubengakaze alishaye igoli. Exoxa naleli phephandaba izolo ntambama, uBrockie ukusho kwagcwala umlomo ukuthi akakhathazekile ngesimo akusona kwiSundowns.
“Angikhathazekile ngokuphikwa ngamagoli. Indaba yamagoli ibuye ihambisane nenhlanhla kwesinye isikhathi. Okwamanje amabhola ami asashaya ipali, amanye avinjwa ngonozinti. Angithukile ngoba iqembu lenza kahle. Amagoli azoqhamuka.
“Ngidinga igoli elilodwa nje ngemuva kwalokho amanye azolandela. Ngakho ngeke ngizifakele ingcindezi ekubeni iqembu lisathola imiphumela emihle. Ngabe ngikhathazekile ukuba iqembu alenzi kahle futhi ngiyehluleka wukushaya amagoli. Okwamanje ngisazama ukufunda ozakwethu,” kusho uBrockie.
Usedlale imidlalo eyisithupha kuyo yonke imiqhudelwano selokhu ejoyine iSundowns. Namuhla uzothola elinye ithuba lokuqeda isinyama uma iSundowns isidudulana ne-EC Bees FC egijima kwi-ABC Motsepe League e-Eastern Cape emdlalweni weLast 16 yeNedbank Cup eLoftus Versfeld Stadium, ePitoli, ngo-7.30 ebusuku.
“Ngeke siyithathe kancane i-EC Bees. Kumele sizinikele ngokuphindiwe ngoba uma sike sathela imizimba phansi izosimangaza. Sesibonile amaqembu amancane emangaza amakhulu kulo mqhudelwano. Nathi asifuni ukubalwa nalawo maqembu. Mina ngiyazi kahle ingozi yala maqembu amancane ngoba sengiwunqobe amahlandla amabili elandelana lo mqhudelwano. “Isifiso sami wukuthi ngiphinde ngiwunqobe ihlandla lesithathu. Zonke lezi zicoco esizilwelayo sifuna ukuziwina. Sifuna ukuvula igebe esicongweni bese sizibekisela indawo esigabeni esilandelayo seNedbank Cup. KwiChampions League sifuna ukungena kweyamaqoqo,” kusho uBrockie.
KwiSuperSport unqobe izicoco ezimbili zeNedbank Cup neseMTN 8.
“Ukuwina izicoco yinto esegazini kimina, yingakho ngijoyine iSundowns. Ngizimisele ukuqhubeka nokuwina izicoco nalapha kwiSundowns. Iqembu lethu lakhiwe ngabadlali abaningi abaseqophelweni eliphezulu. Sinethuba elihle lokuzinqoba zonke lezi zicoco eziphambi kwethu njengamanje,” kusho uBrockie. ISundowns isethubeni lokwemuka nesicoco seligi njengoba isesicongweni kwi-log ye-Absa Premiership.