Amathimba ajutshwe ezibhedlela ‘ezingenzi kahle’
ZIFAKWE ngaphansi kwezingqapheli izibhedlela zakuleli ezingu-44 okuthiwa aziwenzi kahle umsebenzi wazo, ezinhlanu zazo ziKwaZulu-Natal.
Izibhedlela zaKwaZulu-Natal ezingene kulolu hlelo yiRK Khan, Northdale, Ngwelezane, Murchison neLadysmith Hospital.
UMqondisi jikelele woMnyango wezeMpilo kuleli, uDkt Precious Matsotso, uthe bese kunesikhathi bethola izikhalo zeziguli ezingenelisekile ngempatho eziyithola kulezi zibhedlela.
“Iziguli bezikhala ngezinto eziningi, kusukela ekungaphathweni kahle, olayini abade nezinkinga zokwelashwa. Siwumnyango sibone ukuthi kunesidingo sokuthi singenele. Ngesonto eledlule ngibhalele zonke izifundazwe ngaphandle kweNorth West, ngizazisa ngamathimba azofika ezibhedlela ebheka ukuthi kusetshenzwa kanjani, aphinde alekelele abasebenzi bakulezi zibhedlela,” kusho yena.
Uqhube wathi asikho isikhathi esibekiwe sokuthi ithimba ngalinye lizohlala isikhathi esingakanani esibhedlela kodwa kuzoya ngokuthi isibhedlela ngasinye sesiwalungisile yini amaphutha.
Usho lokhu nje okhulumela iDA kwezempilo esiShayamthetho KwaZuluNatal, uDkt Imran Keeka, uthe umthombo wakhe ongashayi eceleni uthe lezi zibhedlela zifakwe kumlawuli womnyango wezempilo.
Uthe sekunesikhathi bekhuluma ngoNgqongqoshe woMnyango uDkt Sibongiseni Dhlomo ngesimo salezi zibhedlela kodwa angabanaki.
“Siyajabula ngalesi sinyathelo somyango kodwa bekumele ngabe kulo luhla kufakwe ne-Addington, isibhedlela saseStanger neSt Mary’s esanda kuthathwa wuMnyango wezeMpilo,” kusho uDkt Keeka.
Uziphendulela ngalokhu uMnyango wezeMpilo KwaZulu-Natal uthumele isitatimende ugxeka iDA ngokwenza izinsolo zokuthi izibhedlela zifakwe ngaphansi komlawuli.
Esitatimendeni uthe iDA lokhu ikwenza ngamabomu ngoba ifuna ukufeza izinhloso zayo zezepolitiki.
“Esikwaziyo wukuthi uMnyango wezeMpilo uthumele ithimba labasebenzi abangu-30 esifundazweni ngasinye. Leli thimba lihlose ukulungisa izingqinamba ezibhekene nezempilo ezweni lonke, kuhlanganisa neKZN. UDkt Dhlomo uhlangane nethimba elizosebenza kulesi sifundazwe ekuseni (izolo). Ithimba siyalemukela sizimisele nokubambisana nalo ukuze siphucule ukusebenza ezibhedlela zethu.”