Usalambele ukubuyela kwi-Absa Premiership umdlali
USALAMBELE ukubuyela kwi-Absa Premiership, uSiboniso “Jomo” Gumede, ohlukane nePlatinum Stars ngaphambi kokuqala kwesizini ka-2017/2018.
UGumede (32) waseMpangeni , owazakhela igama kuMaZulu nakwiBidvest Wits eminyakeni edlule, ubengabonwa nangokhalo kwiPremiership ngesizini edlule. Uhlulekile ukuthola iqembu azogijima kulona emuva kwezinkulumo zokuthi ungomunye wabadlali okuzokwakhelwa phezu kwabo iRichards Bay FC emuva kokudayiswa kweThanda Royal Zulu. UGumede usize iFlamengo edlala kwiSAB League yazibekisela indawo emidlalweni yokuhlunga esifundazweni ezoba seVryheid ngesonto elizayo.
“Ngisafuna ukudlala kwiPremiership. Kumanje ngithungatha iqembu engizodlala kulona. Asikafiki isikhathi sokuthi ngishiye ibhola. Nakuba ngingalitholanga iqembu ngesizini ephelile kodwa bengidlala kwiSAB League ukuze ngihlale ngisesimeni esihle. Ngiyethemba ukuthi kukhona okuzoqhamuka njengoba amaqembu ezovula,” kusho uGumede.
Ngaphambi kokuphela kwesizini ka-2018, kusabalale ukuthi kungenzeka uGumede abuyele kuMaZulu abedonsa kanzima maphakathi nesizini kulandela ukulimala kukaThapelo Nyongo kodwa kwagcina kungenzekanga. Naye uGumede uphumele obala ngokuthi uyafisa ukubuyela kuMaZulu kwazise yilona iqembu elimenze waziwa ebholeni laseMzansi.
UGumede uhlele umqhudelwano webhola waminyaka yonke owaziwa ngeSiboniso “Jomo” Gumede Annual Tournament ezoba sezinkundleni zemidlalo eSikhawini College ngoJuni 24. Umqhudelwano uxhaswe yiNgamla Guest House neBathethwa Security. Angu-16 amaqembu azoqhuthana aqhamuka ezindaweni ezakhele iMpangeni. Kukhona naqhamuka eJozini. Iqembu elizodla umhlanganiso lizogoduka noR30 000. Elizohlulwa kowamanqamu lizothola uR10 000.
“Konke kuhamba kahle. Amaqembu asephelele. Imiqhudelwano enjena iyasiza ekuvunduleni ikhono kubadlali abasebancane nokwenza babone ukuthi bangaba nekusasa ebholeni uma bezimisela,” kusho uGumede.
Khonamanjalo, abadlali bebhola baseCato Ridge, uNkanyiso Mngwengwe weLamontville Golden Arrows, Thamsanqa Mkhize weCape Town City noBongi Ntuli obekade eyibamba kwiPlatinum Stars, bahlele umqhudelwano ozoba ngoJuni 23 no-24 eBanqobile Sport Field naseManzolwandle Sports Field. Iqembu elizodla umhlanganisa lizohlomula ngo-R15 000.