Igunya lokuzifunela iphini kumqeqeshi weBaroka FC
UNIKWE ilungelo lokuziqokela iphini lakhe umqeqeshi omusha weBaroka, uWendson Nyirenda, olaxaze umsebenzi wokuqeqesha iqembu lesizwe laseZambia ngaphambi komqhudelwano iCosafa Cup obukade useLimpopo.
UNyirenda, owayengumgadli weKaizer Chiefs eminyakeni edlule, kuthiwa uqoke ukuzifunela iphini lakhe nokwenza lingacacaci ikusasa likaMcDonald “Bambino” Makhubedu ohlale ebhentshini emidlalweni embalwa emuva kokukhonjwa indlela kukaKgoloko Thobejane maphakathi nesizini. Emidlalweni yokugcina ye-Absa Premiership, iBaroka kade isiqeqeshwa nguDoctor Khumalo oyinhloko yabaqeqeshi.
Isolezwe lithole ukuthi uzolisebenzisa ilungelo lokuzifunela iphini lakhe anikwe lona. Kuthiwa uzolethula kubaphathi ngoLwesithathu. Kuvela ezithi emagameni amabili alaba baqeqeshi kukhona nelikaJabulani “S-Curl” Mendu owayeyinjini yeChiefs neMamelodi Sundowns ongomunye wabadlali abasheshile ukuphanyeka amakhokho emgibeni. UMendu uqeqeshe isikhashana kwiMaluti Chiefs edlala kwiSwazi Premier League ngo-2015.
“IBaroka ifuna uMendu ukuthi azoba yiphini likaNyirenda. Iqembu lizoqala umkhankanso wokufuna abadlali abasha ukulungiselela ukuqala kwesizini. Abaphathi bamnikeze ilungelo lokuzikhombela umuntu afuna ukusebenza naye uNyirenda,” kusho umthombo.
IBaroka izovula ngoJuni 18 iqale amalungiselelo esizini entsha. NgoLwesihlanu izomemezela abadlali abasha ebasayinisile. IBakgaga ichithe inqwaba yabadlali okukhona kubona uTalent Chiwapiwa okuthiwa usebangwa amaqembu kwiPremiership. Kuleli sonto kuzoqedelwa ukuhlolwa kwabadlali.
Isikhulu esiphezulu seBaroka, uMorgan Mamilla, asifunaga ukuphumela obala ngendaba kaMendu.
“UNyirenda ufuna ukuziqokela umuntu azosebenza naye. Simnikile lelo lungelo. Ngingakuqinisekisa ukuthi iphini lakhe kuzoba ngelaseNingizimu Afrika. Usinikeze amagama amabili abantu azokhetha kubona. Sesilinde yena ukuthi asitshele ngoLwesithathu ukuthi uqoka bani kulabo baqeqeshi,” kusho uMamilla.