UKwesta uhlela ukujabulisa abalandeli bakhe
UHLELA ukuhambela amadolobha ahlukene ajabulise abalandeli bakhe ngomculo uKwesta ingoma yakhe ethi Spirit eshise izikhotha ekupheleni konyaka odlule.
Uthe ingoma yakhe ephume ezinyangeni eziyisikhombisa ibe ngenye aziqhenya ngayo kakhulu.
Ekhuluma ohlelweni i-V Entertainment ku1Magic, uKwesta uthe kusekuningi afuna ukukwenza emculweni.
“Kuningi okuhle okwenzekile ngemuva kokuphuma kwale ngoma. Kodwa kube nezigigaba njengoba i-video yayo iveza impilo yaselokishini. Kube nesigaba lapho kuvezwa khona kunqunywa inkukhu kwaba khona abangithintayo bekhala ngaso njengesingakulungele ukuvela kuthelevishini,” kuchaza uKwesta.
Uthe kodwa ayecabanga ukuthi kuzomkhulumisa kakhulu wukubonakala kushiswa ifulegi lakuleli lakudala lesikhathi sobandlululo.
“Ngihlela ukuthi ngibe nohambo emadolobheni ahlukene kodwa angazi ukuthi ngizoluqala nini. Ngisezinhlelweni zokuthi ngihlanganise leyo micimbi,” kusho uKwesta.
Uthe uzokhipha i-albhamu ephelele maduzane ngemuva kwalokho bese ema kancane.
“Nokuphuma ephephabhukwini laphesheya kwezilwandle kusho lukhulu kimina futhi ngiqhamuke nento ehlukile njengoba ngokujwayelekile kuvela abantu abagqoke amasudi kodwa mina ngivele ngagqoka ngendlela ehlukile futhi lokho akubanga yinkinga,” kusho uKwesta.