Intsha ayilwe nesifo sofuba neHIV: Mabuza
IPHINI likaMengameli wezwe, uMnuz David Mabuza, lidonse ngendlebe intsha ukuthi njengoba kuyinyanga yayo ilwe nokwanda kwesifo sofuba neHIV.
UMabuza ubevula ingqungquthela yesifo sofuba eNkosi Albert Luthuli International Convention Centre (ICC), eThekwini, izolo.
Uthe intsha yango-1976 yayilwa nobandlululo kodwa eyamanje kufanele ilwe nokubhebhetheka kwesifo sofuba, iHIV nokungabikhona kwazo zonke izinhlanga kwezomnotho.
“UJuni yinyanga yabantu abasha, sifuna basisize ukulwa nesifo sofuba ngoba akekho umuntu okufanele abulawe yiso ngoba siyalapheka,” kusho uMabuza.
Uthe baningi abantu eNingizimu Afrika abanesifo sofuba kodwa abangazi ukuthi banaso ngenxa yokungazihloli.
“Sicela abantu bazihlolele zonke izifo ngoba akekho esifuna abulawe yisifo sofuba ibe imishanguzo ikhona. Sonke kufanele sibe ngamanxusa esifo sofuba, sishumayele umyalezo wokuthi isifo sofuba siyalapheka futhi wonke umuntu kufanele azihlolele sona ngoba asikhethi siphatha wonke umuntu,” kusho uMabuza.
Unxuse abaculi ukuthi babhale izingoma ezigqugquzela abantu ukuthi bazihlolele isifo sofuba neHIV. Unxuse ikhwaya yeNyuvesi yaseZululand ebicula ingoma ethi isifo sofuba siyalapheka ukuba ibe ngamanxusa alesi sifo neHIV.
Kuhlokome inkundla ethembisa ukuthengela ikhwaya ibhasi ezohamba ngayo iNingizimu Afrika yonke icula ngesifo sofuba neHIV, izogqoka umfaniswano omuhle ezowunikwa nguhulumeni.
Ugqugquzele abantu baseNingizimu Afrika ukuthi basike iphethini kowayengumengameli wokuqala wentando yabantu, uDkt Nelson Mandela, obezobe egubha iminyaka ewu100 azalwa nakuNkk Albertina Sisulu.
Uthe uMandela wayenesifo sofuba asinqoba ngokudla imishanguzo.
UNdunankulu waKwaZulu-Natal, uMnuz Willies Mchunu, uthe baningi abantu abanesifo sofuba kulesi sifundazwe.