ILeopards imincele ukudlalela ekhaya
AMAHLEBEZI okuthi iBlack Leopards ingase ingayidlaleli eThohoyandou Stadium imidlalo yayo yasekhaya awasikhathazi nakancane isikhulu seBlack Leopards, uTshifiwa Thidiela.
ILidodha Duvha ikhuphukele kwi-Absa Premiership ngemuva kokunqoba imidlalo yokuhlunga ebiyibanga nePlatinum Stars neJomo Cosmos ngenyanga edlule.
ILeopards ingelinye lamaqembu okuphuma nesinedolo uma idlalela ekhaya, ekubeni ingelona iqembu elithathwa njengelikhulu. IMaritzburg United neBloemfontein Celtic ngamanye amaqembu anabalandeli abangezwa mshini.
Inkulumo yesikhulu esiphezulu kwiPremier Soccer League (PSL), uRonnie Schloss, yokuthi bazobhekisisa kahle iThohoyandou Stadium ngaphambi kokuba kuqale isizini, ithathwe ngokuthi kungenzeka iPSL ilishintshise leli qembu, hlawumbe liyidlalele ePeter Mokaba Stadium imidlalo yalo yasekhaya.
Ngokusho kukaSchloss, bazobheka kwasani eThohoyandou Stadium kusuka ezakhiweni, amathoyilethi, ukukhanya kukagesi, nokunye okungenza impilo yabadlali ibe nzima.
UThidiela uthe usewazwile amahebezi okuthi ezakhe zingase zingavunyelwa iPremier Soccer League (PSL) ukudlalela imidlalo yazo eThohoyandou Stadium ngenxa yokushoda “kwezinto ezimbalwa”.
UThidiela uthe abathandi bebhola baseThohoyandou bazoyibuka ekhaya iLidodha Duvha ngesizini ezayo.
“Ngiwazwile lawo mahlebezi, kodwa cha, kusengamahebezi nje kwaphela ngoba akukho iPSL esasitshele kona. Imithetho yemidlalo yeNational First Division (NFD) ithe kufanele inkundla yeqembu imumathe abantu abangu-3 000. Kwi-Absa Premiership kufanele inkundla yeqembu imumathe abantu abangu-5 000. Thina eyethu inkundla imimutha abantu abangu-25 000.
“Kungangimangaza-ke ukuthi kugcine kuthiwe asingayidlali imidlalo yethu yasekhaya ngoba inkundla yeFree State Stars, iGoble Park, neyeBidvest Wits, okuyiBidvest Stadium, zimumatha abalandeli abancane kakhulu uma uqhathanisa neyethu. Ngiyakuvuma kodwa ukuthi zikhona izinkinga ezincane, njengodaba lukagesi ongakhanyi nokunye okuncane esisezinhlelweni zokukulungisa ngaphambi kokuqala kwesizini,” kusho lesi sikhulu.
Imidlalo engaphansi kwePSL izoqala ngasekuqaleni kuka-Agasti.