UBartlett ubheke okungcono kuMessi, Neymar noRonaldo
BASEKHONA abathandi banobhutshuzwayo emhlabeni jikelele abasakholelwa ekutheni umdlali uba yinkakha ngokunqoba isicoco seNdebe yoMhlaba.
Lokhu kushiwo uShaun Bartlett owaba yingxenye yeqembu lesizwe iBafana Bafana elaqopha umlando lingena kwiNdebe yoMhlaba okokuqala ngo-1998, eFrance. Ukhuluma kanjena nje uBartlett, abantu sebeqalile ukukhuluma ngokuthi kazi iyozala nkomoni kubadlali abathathu abathathwa njengabakhulu emhlabeni, okunguNeymar Jnr waseBrazil, Lionel Messi wase-Argentina noChristiano Ronaldo wasePortugal.
UBartlett, oke wagijima kwiCharlton Athletic yase-England eminyakeni edlule, uthe kule Ndebe yoMhlaba eqala kusasa eRussia kuzocaca inkunzi phakathi kwalaba badlali bobathathu.
“Ingcindezi abanayo bobathathu ukuthi banabalandeli abaningi emhlabeni jikelele abakolodelanayo ngalezi zihlabani. Bona bobathathu abakenzi kahle emaqenjini esizwe ngaphandle kukaRonaldo onqobe isicoco se-Euro nakhona kanzima.
“Uzokhumbula ukuthi nombango wendondo yeBallon d’Or usalokhu uqhubeke njalo. Kubalulekile ukuthi uMessi, Ronaldo noNeymar badlale kahle kwiNdebe yoMhlaba ngezizathu ezifanayo esengizibalile,” kusho uBartlett ozohlaziya imidlalo yeNdebe yoMhlaba esiteshini sethelevishini, iSuperSport.
Ngesizini ephelile uNeymar uhlushwe ukulimala okucishe kwamshwebisa ngeNdebe yoMhlaba, kanti uRonaldo unqobe isicoco se-Uefa Champions League neReal Madrid nobese kungokwesithathu kulandelana. UMessi unqobe isicoco seLa Liga neseCopa Del Rey neBarcelona waphinde wanqoba indondo yeGolden Boot, e-Europe njengoba kunguyena ovalele phakathi amagoli amaningi.
“Ngokwami umdlali owina iBallon d’Or akabhekwa ngokwenza kahle kwiNdebe yoMhlaba kepha kubhekwa izinto azenze neqembu lakhe ekunqobeni izicoco. UMessi nguyena osethubeni elihle ngoba uvalele phakathi amagoli amaningi, waphinde wanqoba nezicoco ezimbili. Ngakolunye uhlangothi uRonaldo uqophe umlando enqoba kathathu kulandelana isicoco seChampions League neLos Blancos.
“Kodwa uNeymar ngibona esethubeni elihle lokuzibonakalisa ngoba uphumule izinyanga ezimbili elimele. Ngimbona ezoba ngumshini ngoba laba bobabili (uMessi noRonaldo), noma bengaziqinisa kodwa isizini ibiyinde kakhulu, kungenzeka nokukhathala kuzibusele kubona,” kusho uBartlett othe uthipha iBrazil ukuthi isithathe isicoco seNdebe yoMhlaba.
Umdlalo wokuqala uzoba phakathi kosokhaya, iRussia, ezotholana phezulu neSaudi Arabia kusasa, eLuzhniki Stadium eMoscow, ngo-5 ntambama.