Kufufusa isiteleka eNyuvesi iFort Hare

Isolezwe - - IZINDABA - INTATHELI YESOLEZWE

INEHAWU ilungiselela isiteleka enyuvesi yaseFort Hare kulandela ukubhuntsha kwezingxoxo zamaholo.

UNobhala jikelele uMnuz Zola Saphetha uthe umxazululi, iCCMA ikhiphe isitifiketi sokuthi abavumelani ngoba umqashi akafuni ukuhlangabezana nezimfuno zabo.

Uthe umqashi ulokhu ehlehlisa ukuthi baye ezingxoxweni kusuka nyakenye ngaphandle kwezizathu ezibambekayo.

“Le nyuvesi ayikhokheli abasebenzi ngendlela efanele uma uqhathanisa namanye amanyuvesi angu-25 akuleli. Iyahluleka ukuheha abantu abanamava yingakho silwa ukuze abasebenzi bethu bathole okubafanele,” kusho uSaphetha.

Uthe bafuna ukunyuselwa amaholo ngo-12%, banikwe imali yezindlu enguR500, kubuyekezwe izimo zokusebenza.

“Umqashi uphakamise u-6%, nokunyusa imali yezindlu ngoR100. Siyayichitha indaba yokuthi kunxeshezelwe abasebenzi abayitoho ngoR150 ngoba yimizamo yokubukela phansi abasebenzi,” kusho uSaphetha.

Uthe banethemba lokuthi abaqashi bazoyeka ukuqinisa ikhanda bazehlise baxoxe nabo ukuze kungaphazamiseki ukufunda nokufundisa.

“Sisabalindele ukuthi beze kuthina sizoxoxa. Sikhona noma yinini sibalindile yingakho sifuna ukuthi beze kuthina nento engcono kunalena abayiphakamisayo okwamanje.”

Kube nokuphazamiseka ngoLwesibili kule nyuvesi njengoba kuthiwa amalungu ale nyunyana ophikweni lwase-East London amise nse ukusebenza ekhala ngokunyuselwa imali.

Okhulumela inyuvesi uMnuz Khotso Moabi, uthe izingxoxo zifinyelele kwangqingetshe ngemuva kokuba iNehawu ifuna ukunyuselwa amaholo ngo-12% ekubeni bona bebeke u-6%.

UMoabi uthe ayikho imihlangano ehleliwe neNehawu wathi kodwa bazimisele ukuxoxisana nale nyunyana.

Newspapers in Zulu

Newspapers from South Africa

© PressReader. All rights reserved.