Isicelo sowoKlebe kolwamabhomu
UBRIGADIER Hangwani Mulaudzi woKlebe, utshele Isolezwe ukuthi basebenza kanzima ukuthungatha abantu abasabisa ngokuthi kunamabhomu ezinxanxatheleni zezitolo eThekwini namaphethelo.
UMulaudzi usho lokhu emuva kokuvela kwemibiko yokuthi bazoboshwa maduze abasabisa ngamabhomu ngoba amaphoyisa ayabazi.
“Baziwa wobani abantu abasabisa ngamabhomu? Buzani labo ababhale lokho ngoba thina sisebenza kanzima ukuthungatha abasabisayo. Sisanxusa umphakathi ukuthi wehlise umoya ngoba senza konke okusemandleni ukuqinisekisa ukuthi abathintekayo kulolu daba bayaboshwa futhi bashushiswe, kuyicala ukusabisa ngokuthi kunebhomu libe lingekho,” kusho uMulaudzi.
Ngesonto eledlule abathengi nabasebenzi bezitolo eziseCornubia Mall bakhishelwe ngaphandle emuva kokuthi abaphathi bethole ucingo obeluthi kunebhomu kulezi zitolo.
Amaphoyisa ophiko lweziqhumane abheke yonke indawo kodwa angalithola ibhomu kuphinde kwasatshiswa ngokuthi kunebhomu esiteshini samaphoyisa sasePhoenix nasebhilidini elisenkabeni yeTheku.
Phambilini kutholakale iziqhumane enxanxatheleni yezitolo iPavilion Shopping naseGateway.
Esinye isiqhumane satholwa ngaphansi kwemoto eyayipakwe eGreyville.
UMnuz Willem Els oyitraining co-ordinator for counter terrorism e-Institute for Security Studies (ISS), uthe izigameko zamabhomu zigcwele kakhulu eThekwini kodwa abantu akufanele baphakanyelwe wumoya kodwa abalinde amaphoyisa ukuze abanike imininingwane egcwele ngalesi simo.
Uthe okwamanje ngeke bakuqinisekise ukuthi amabhomu enziwa ngabashokobezi kodwa iziqhumane ezitholakele zifana nalezo ezisetshenziswa yibona.
Ugqugquzele abantu ukuthi bahlale beqaphile futhi bangazithinti izinto ezibukeka njengemishini emincane abangazazi.