Usuthu luphokophelele ekuwineni isicoco seligi
ULUNGA Sokhela oyisikhulu esiphezulu kuMaZulu FC uthi akangabazi ukuthi Usuthu luzosiwina isicoco se-Absa Premieship kungekudala.
Ngokusho kwalesi sikhulu, uxhaso abalutholayo kwaSpar nabadlali ababasayinisile, kuveza ukujula kwamaphupho abo kuleli qembu.
USokhela ukusho lokhu ngesikhathi Usuthu lwethula abadlali abasha nejezi elisha elixhaswe yinkampani yase-United Kingdom i-Umbro, ngoLwesihlanu ePhoenix eThekwini.
“Akusasiniswa amahleza manje. Awusekho nowodwa umdlalo esizowudlalela ukuthi sithi sifuna ukuthola iphuzu, cha. Yonke imidlalo yethu siyidlalela ukunqoba. Isifiso sethu esikhulu wukunqoba isicoco seligi. Lokho kuyinto engenzeka kulo nyaka, noma eminyakeni embalwa ezayo. Ngisaphinda ngithi kufanele siqale ukukhombisa ukuthi nathi sesingelinye lamaqembu alwela isicoco seligi,” kusho uSokhela.
AmaZulu ethule abadlali abayisikhombisa ngoLwesihlanu, okubalwa kubona umgadli wase-Argentina u-Emiliano Tade, Nhlanhla Vilakazi, Moeneeb Josephs, Marc van Heerden, Charlie Hlalele, Xolani Silawula noBoiki Modikaseng.
“AmaZulu ayiqembu elihlonishwayo. Sinabaxhasi abayizinkampani ezinkulu uSpar no-Umbro abakhombisa ukusethemba okukhulu. Sekufanele siqale ukucabanga izinto ezinkulu manje ukuze sijabulise abaxhasi bethu. Muningi umsebenzi owenziwa kuleli qembu kusukela emazingeni aphansi kwi-Under 13 kuze kuyofika eqenjini elikhulu. Kungakho sifuna ukudla izicoco manje. Noma kungeke mhlawumbe kwenzeka njengoba sifisa kodwa okubalulekile siyazazi ukuthi sifunani,” kusho lesi sikhulu.
USokhela uphinde wakhuluma ngodaba olungundabamlonyeni kulezi zinsuku lwePremier Soccer League (PSL) ebhekene ngeziqu zamehlo ne-Ajax Cape Town. Umbango usekutheni i-Ajax yaphucwa amaphuzu ngemuva kokutholakala kokuthi yaba necala ngokudlalisa uTendai Ndoro obesedlalele amaqembu amabili (ngaphambi kwe-Ajax). Umthetho weFifa uthi umdlali akakwazi ukudlalela amaqembu amathathu ngesizini eyodwa.
Ukuphucwa kwe-Ajax amaphuzu kwaholela ekutheni Usuthu luphume kwiTop 8, kungene iSupersport United.
“Ngosuku lokugcina kwiligi sathola unombolo 8. Lona leli qembu elizama ukuthatha unombolo 8 wethu salishaya kabili ngesizini edlule (ekhaya nasekuhambeni). Konke lokhu osekwenzeka manje ngeligi akunabo nhlobo ubulungiswa futhi kuyaxaka. Manje sekulokhu kwehliwa kwenyukwa ezinkantolo ngento engiyibona ilula. Kuthiwa kuyalungiswa, kulungiswani? Angithi yaphela isizini saphelela kunombolo 8? Nokho sekukhona abathile le nto esebeyenza eyabo. Kubi nokho ngoba kuthumela isithombe esingesihle ngebhola lakuleli,” kusho uSokhela.