Ulala obenyoni umndeni wokhishwe amathumbu
UHLALELE ovalweni umndeni wakwaMkhize eNgcongangconga eduze kwaseBhamshela emuva kokuhlaselwa kwendodana yawo egwazwe amahlandla amaningi yakhishwa namathumbu ngaphandle kodwa yasinda.
UMnuz Thembinkosi “Sol” Mkhize (35) kuthiwa usesimeni esibucayi esibhedlela esingeke size sidalulwe ngenhloso yokumvikela kulandela ukulinyazwa ngabantu abangaziwa ngeSonto.
Ukuhlaselwa kukaMkhize kulandela ukubulawa kukamfowabo omdala ngonyaka odlule, uMnuz Senzo “Zehla” Mkhize, owabulawa nomngane wakhe, uMnuz Mboniseni Mgenyana, izidumbu zabo zatholwa sezonakele ngoNovemba emuva kwezinyanga ezinhlanu bedukile.
Izidumbu zabo zatholwa emhosheni, ehlathini elisesigodini sakwaGcwensa bude buduze naseNgcongangconga.
Isolezwe labika kabanzi ngokutholakala kwezidumbu zalawa madoda nokwaholela ekutheni kuboshwe abasolwa abathathu, omunye wabo owabanjwa neselula kaMkhize (Zehla). Laba basolwa basagcinwe ezitokisini njengoba icala labo lisaqhubeka.
Ilungu lomndeni, elikhulume neSolezwe kodwa lacela ukuthi lingadalulwa ngoba lizibona lingaphephile, lithe bahlalele ovalweni ngoba sekucacile ukuthi ikhona impi ebhekiswe emndenini wabo.
“Baqale babulala uZehla (uMkhize) bayomlahla emhosheni njengoba manje sebehlasela umfowabo omncane naye osesimeni esibucayi esibhedlela,” kusho leli lungu lomndeni.
Lithe umfowabo osesibhedlela ubatshele ukuthi abahlaseli bathe bambulala ngoba engumfowabo kamufi.
“Umfowethu bamthathe esesitolo, bamhudula phansi, bamshaya baze bafika naye eduze komfula iPhambela lapho befike khona bamgwaza bephindelela, bamshaya nangamatshe kwasiza amanye amalungu omphakathi,” kusho ilungu lomndeni.
Lithe mhlawumbe ngabe kukhulunywa ukuthi umfowabo omncane naye ufile ukuba umphakathi awuzange usize.
“Asazi ngempela ukuthi inkinga ikuphi kodwa engingeke ngize ngikuphike ukuthi umfowethu owabulawa uke wathinteka ezintweni zobugebengu njengoba eke waboshelwa icala lesibhamu nokubulala kodwa wabuye wadedelwa, manje ngeke sazi noma sibulawelwa amacala akhe,” kusho ilungu lomndeni.
Lithe icala belingakavulwa emaphoyiseni ngoba athe afuna livulwe umgilwa.