Akusizwe abagilwa yimvula, kusho uZikalala
UHULUMENI wakwaZulu-Natal unxuse abasebenzi ukuthi basebenze ngokushesha ukusiza imiphakathi eyalinyalelwa yimizi nezinto ngenxa yemvula.
Ibamba likaNdunankulu, uMnuz Sihle Zikalala, linxuse abantu emhlanganweni weKhabhinethi obusendaweni okwaboshelwa kuyo owayenguMengameli wezwe, uMnuz Nelson Mandela, iNelson Mandela Capture Site, eHowick.
UZikalala uthe ukushintsha kwesimo sezulu yinto ekhona ngakho kumele ibhekwe indaba yokuthi kube nesinye isikhwama esizosiza sibhekane nezinhlekelele.
Imvula ihlukumeze imiphakathi yasoThukela, Umzinyathi naseHarry Gwala yacekela phansi imizi engaphezu kuka-400. Kwalimala abantu abayisihlanu.
IKhabhinethi ithole nombiko ngokubulawa kwabantu eGeorgedale, eMpumalanga, lapho kuthiwa kukhona owadubula abantu abawu-11.
Kuvele nokuthi sekufe abantu abawu-57 eMkhumbane naseCato Crest.
Indawo iNkanini kuthiwa isephenduke u-alubhadwa. Sekujutshwe ithimba elizobhekana nodlame njengoba kuyiwa okhethweni.
IKhabhinethi yamukele nombiko ngokuzokwenziwa nguMnyango wezokuBusa ngokuBambisana ngendaba yokuthi kuhlale kuhlanzekile uMgungundlovu.
Izikhulu zomnyango nezikaMasipala uMsunduzi ngelizayo zizobe ziqhuba ummkhankaso wokuhlanza idolobha.
Kunemizamo eyenziwa nguhulumeni ukuzama ukuxazulula isimo emphakathini waKwaMbonambi neRichards Bay Minerals (Pty) Ltd.
UZikalala uhole ithimba elizama ukuxazulula lesi simo.
Kuzoba nomhlangano ngoFebhuwari 17.
IKhabhinethi yeseka nomcimbi Umthayi Marula Festival oba sesigodlweni senkosi uMabhudu Tembe ozoba ngoFebhuwari 23.
Kulindeleke abantu abawu-40 000 abazothamela umcimbi.