Uvulelwe icala uthisha ‘oshaye’ umfundi
UNINA womfundi waseSans Souci Girls’ High uvulele uthisha icala oshaye ingane yakhe yentombazane ena16 ngempama.
Kusabalele i-video yalo thisha wesifazane eshaya lo mfundi kanti nesigungu sesikole siyaluphenya lolu daba.
Lesi sehlakalo siyamaniswa nesobuhlanga njengoba lo thisha omhlophe ebonakala ekhuluma nalo mfundi ngendaba yamaselula ekilasini.
Kubonakale imoto yamaphoyisa ingena kulesi sikole esiseNewlands kanti kuyona bekunalo mfundi oshaywe nguthisha.
Unina womfundi uthe bavule icala lokushaya.
“Kunezinhlelo ezilandelwa yisikole, kunophenyo okwamanje oluqhubekayo mayelana nalolu daba.”
Uthe umbonile uthisha esiteshini samaphoyisa kodwa akamazi ukuthi ubezokwenzani.
Izolo ekuseni abanye babafundi babhikishe ngesikhathi kuthandazwa nangaphandle kwesikole ukweseka uthisha.
Bebephethe uqwembe oluthi lolu daba aluhlangene nobuhlanga futhi uthisha akacwasi.
AboMnyango wezeMfundo waseWestern Cape bebesesikoleni izolo ekuseni bezophenya.
Abanye abafundi bathe umfundi unezinkinga futhi uthisha ubengeke enze kanje engazange acasulwe.
Omunye wabafundi osemkhandlwini wabafundi uthe lolu daba aluhlangane nokucwasa njengoba kubike abanye bezindaba.