Useshintshile uzobuyela eringini uKomanisi
USHAYE ingwijikhwebu ngokuyeka isibhakela obengumpetha we-International Boxing Organisation (IBO) featherweight, uLusanda “Mexican” Komanisi, omemezele ukuthi ngeke esazihlanganisa nalo mdlalo ngasekupheleni konyaka odlule.
UKomanisi ukusho lokhu emuva kokwehlulwa nguMichael Mokoena empini yemizuliswano engu-10. Uvume phansi ngomzuliswano wesine. Bekungokwesibili uKomanisi ehlulwa ngomngqimuzo womlalisa phansi izimpi zilandelana.
Uqalwe nguJhack Tepora wasePhilippines omlalise amankeyane ngo-2017 bebanga ibhande le-World Boxing Organisation (WBO) Inter-Continental Featherweight phambi kwabalandeli bakhe e-East London.
Izolo uKomanisi, owayedalule ukuthi uzofuna uxhaso kumasipala wangakubo ukuze athuthukise isibhakela, utshele leli phephandaba ukuthi uzobuyela eringini kungekudala.
“Ngesikhathi ngifika ekhaya ngibatshela ukuthi sengiyasiyeka isibhakela bangiphikisile, bathi angibuyele khona. Abangani bami nabantu ebengihlangana nabo endleleni bebengavumelani nesinqumo sami. Ngithathe isinqumo sokuthi ngibuyele eringini,” kusho uKomanisi.
Nakuba engakabi naye umqeqeshi asesayine naye kodwa usaqeqeshwa nguVusi Mtolo osebenzisana noCollin Nathan. Emasontweni edlule kade engcweka noXolani “Tiger” Mcotheli olungiselela impi yebhande le-WBA Pan African Junior Welterweight noJabulani Makhense ezoba se-Emperors Palace ngoFebhuwari 24.
“Sengibuyelwe wumdlandla wokuqhubeka nesibhakela. Ngizohlanganisa iminyaka engu-29 nonyaka. Ngifuna ukuhlanganisa iminyaka engu-30 sengiwumpetha womhlaba. Ngiyakholwa ukuthi kusekuningi engingakwenza esibhakeleni. Ngisengawenza umsebenzi eringini,” kusho uKomanisi.