OweMaritzburg uthi ngeke badliwe izembe
UBRIAN Onyango ongukaputeni weMaritzburg United, ushaya phansi ngonyawo, uthi ngeke bagawulwe yizembe.
Nakuba isimo seTeam Of Choice sesiqala ukwethusa kwazise bayibambe emsileni ngamaphuzu angu-11 emidlalweni engu19, u-Onyango uthe iseminingi imidlalo ebasalele, ngakho abakaxhamazeli nakancane.
Emidlalweni engu-19 esidlalwe ngezikaEric Tinkler, zisashaye kuphela amagoli ayisithupha. Selokhu zagcina ukunqoba umdlalo ngoSepthemba wangonyaka owedlule.
“Siyazethemba ukuthi sizophuma kulesi simo esikusona. Empeleni eminyakeni emibili eyedlule, sibe sesimeni esifanayo saphunyuka. Uma ukhumbula kahle, ngaleso sikhathi sasisalelwe imidlalo emihlanu kanti manje sisalelwe engu-11, ngakho ithemba likhona kakhulu. Empilweni yami yebhola angikaze ngagawulwa yizembe, ngisho neSantos engake ngayidlalela ngangiyifice isidlala kwiNFD, kangehlanga nayo,” kusho u-Onyango.
I-Maritzburg empeleni yagcina ukunqoba ishaya iBloemfontein Celtic ngo 1-0, emdlalweni owawungoSepthemba 23. Kusasa iTeam Of Choice izobhekana nePolokwane City emdlalweni we-Absa Premiership ozoqala ngo-8 ebusuku.
“Sizoqala ukunqoba ngoLwesihlanu (kusasa) uma sesibhekene nePolokwane City. Sifisa abalandeli bethu bephume ngobuningi babo, ngoba zizojika izinto manje. Uma sizwa abalandeli bethu besibongela siba nomdlandla kakhulu, ngakho siyabadinga kakhulu. Siyethemba ukuthi sizowathola amaphuzu aphelele kwiPolokwane.
“Okunye okungichazayo ukuthi umqeqeshi wethu omusha usinike inkululeko yokuzibonakalisa. Kungakho sidlale kahle sibhekene neBidvest Wits, ngeshwa sagcina ngokudliwa,” kubeka u-Onyango.
USiyanda “Magazi” Xulu uyena obengukaputeni weMaritzburg ngaphansi kukaFadlu Davids noMuhsin Ertugral. Kodwa emdlalweni neWits, ibhande ligqokwe ngu-Onyango.
“Eqinisweni nguXulu osengukaputeni, mina ngizobamba kuze kuphele isizini. Ngiyacabanga ukuthi umqeqeshi unezizathu zokuthi kungani enike mina ibhande okwamanje, kodwa cha uXulu ongukaputeni.
“Uma ubukisisa kahle, iqembu lethu sonke singokaputeni ngoba kuyenzeka kube khona engikutshelwa ngumlingane wami, nami ngokunjalo kukhona engikutshela umlingane wami. Lilonke nje, sonke siyadingana,” usho kanje u-Onyango.