Ziyaqhubeka eze-Athletix Grand Prix
INHLANGANO yezokugijima eNingizimu Afrika, iSouth African Athletics (ASA) isiphumele obala yagcizelela ukuthi ziyaqhubeka izinhlelo ze-Athletix Grand Prix yanonyaka phezu kwemibiko yokuswela abaxhasi.
Kuvele ukuthi iLiquid Telecom ebixhase lo mqhudelwano obuqala nyakenye ayisivuselele isivumelwano sayo ne-ASA.
Lokhu kushiye imibuzo ngokuthi ngabe izoba khona yini iGrand Prix, nyakenye ehehe nabasubathi bangandle njengoJustin Gatlin wase-USA. Kulo nyaka kulindeleke ukuthi le midlalo ewuchungechunge lwemilenze emithathu, isize abagijimi bakuleli kwazise lona wunyaka we-IAAF World Championship eDoha ngoSepthemba.
Kuleli sonto I-ASA ikhiphe isitatimende ithi imidlalo isazoqala ngo-Ephreli 9 njengoba kuhleliwe kwazise ixoxisana neStillwater Sports ukuze izoba ngabaxhasi.
Umengameli we-ASA u-Aleck Skhosana uthe likhulu ithemba lokuthi bazobathola abaxhasi abasha.
“Kuyasikhuthaza ukwazi ukuthi singase sithole abaxhasi abasha abaveze isifiso sokusebenzisana ne-ASA ukubamba uchungechunge lwalo nyaka. Umqhudelwano wangonyaka odlule waba nomthelela omuhle kwesisebenzisana nabo. I-ASA iyaziqhenya ngaleyo mpumelelo yingakho sikusho ngokuzethemba ukuthi ukusebenzisana nezokusubatha kuzolikhuphula igama lalabo abazimisele ukusebenza nathi,” kusho uSkhosana.
Ube esephumela obala ngokunqamuka kobudlelwane abebenabo neLiquid Telecom obekumele kube yisivumelwano esizophela ngonyaka ozayo.
“Isivumelwano seminyaka emithathu sinqanyulwe ngemuva komlenze wokuqala wochungechunge (lweGrand Prix) kodwa ngokuhlonipha isivumelwano sokusebenzisana esiyimfihlo ngeke sidalule izizathu ngaphandle kokuthi kusekhona ukuphikisana ngalokhu.”