Ufuna ubulungiswa ogwazwe elamula

UFUNA kuboshwe abasolwa umndeni wowesilisa osemncane okuthiwa ugwazwe kade elamulela abebebanjwa inkunzi eWorkshop, eThekwini.

UMnuz Wandile Dlamini (23) kuthiwa ugwazwe amanxeba amabili ngasenhlizweni ngoLwesibili emuva kokuba ekhuze abanye abafana abebebamba inkunzi abantu abadala eWorkshop ngaseGugu Dlamini Park.

Unina kamufi, uNkk Hlengiwe Ndlovu, utshele Isolezwe ukuthi njengoba behlala efulethini enkabeni yedolobha, umufi ubejwayele ukuyozihlalela nabangani bakhe eWorkshop.

“Wahamba ngabo-2 emini endlini, ngizwe sengishayelwa ucingo kuthiwa ulimele, ugwaziwe. Ngavele ngathi abamphuthumise kadokotela nami ngase ngiya khona. Kwaphinde kwashaywa ucingo kuthiwa wopha kakhulu. Ngacela amaphoyisa ukuba amphuthumise kadokotela, njengoba wagwazelwa ngakhona esiteshini samaphoyisa esiseWorkshop.

“Abazange bakwazi ukumsiza ngaze ngathi abaqashe itekisi imphuthumise. Wafika washonela khona esibhedlela,” kusho uNkk Ndlovu.

Uthe wathola ngomama abadayisa eWorkshop ukuthi indodana yakhe ihlaselwe ngoba ilamulela ababebanjwa inkunzi.

“Esikufunayo njengomndeni ukuba ababulali baboshwe,” kusho uNkk Ndlovu. Uthe kuningi abesakubheke kwindodana yakhe njengoba ibisencane inamaphupho.

Okhulumela amphoyisa KwaZuluNatal uColonel Thembeka Mbele uthe, kuvulwe icala lokubulala esiteshini saseDurban Central, akekho osaboshiwe.