Ubaba uvele enkantolo ngecala lokunukubeza
UMNDENI wowesilisa oneminyaka engu-28 oboshelwe ukudlwengula indodakazi yakhe (5) KwaDambuza, eMgungundlovu, ufuna amaphoyisa enze umsebenzi wawo.
Lo msolwa izolo uvele enkantolo yaseMgungundlovu ngecala lokudlwengula indodakazi yakhe elenzeke ngempelasonto.
Ngokuthola kweSolezwe, umsolwa wayephuze kakhulu utshwala wabe esecela indodakazi yakhe ukuba izolala naye.
Kuthiwa ebusuku umgilwa uzwakale ememeza ekhala, abomndeni bayifica ingane lapho ilele noyise ikhala ngokuthi “kubuhlungu”.
Ibe isiphonswa ngemibuzo, kwavela ukuthi uyise uyidlwengulile.
Yaphuthunyiswa esibhedlela ingane kwatholakala ukuthi ngempela inukubezwe ngokocansi. Umsolwa wabe eseboshwa.
Unina womsolwa okunguyena ovule icala uthe akazi ngempela indodana yakhe ibingenwe yini ngoba iyayithanda ingane yayo.
“Ngeke ngikwazi ukuchaza yonke into. Ibivakashile ingane. Unina washona. Imina engivule icala, ngavulela ingane yami (umsolwa), ngoba sekuvele ukuthi umzukulu wami udlwenguliwe kade elele naye. Kumanje uyaphika (umsolwa) uthi akazi lutho. Usaqhubeka noma engaphuzile uthi akazi. Amaphoyisa awenze umsebenzi wawo kuleli cala. Ingane yakhe uyayithanda kodwa utshwala ngicabanga ukuthi ibona obumoshile. Ungumuntu ophuzayo kodwa besiqala ukuthi enze kanjena. Ngibuze ingane yavuma ukuthi uyise uyidlwengulile. Uma simbuza uyaphika kodwa ingane iyaqinisekisa, futhi iyile kohlolwa kwathiwa idlwengulile.Ngeke simvune,” kuphetha unina womsolwa.
Okhulumela amaphoyisa KwaZulu-Natal uCaptain Nqobile Gwala uthe: “Kuboshwe umsolwa uneminyaka engu-28. Umgilwa kuleli cala uneminyaka emihlanu. Uphenyo lusaqhubeka,” kusho uCapt. Gwala.
Umsolwa uvele izolo enkantolo kodwa idokodo lecala lisagcinwe enkantolo.