I-NPC ibona isidingo sokuhlenga abasafufusa
UHLAKA olubhekele ezokuhlela kuleli iNational Planning Commission (NPC) luphakamise ukuthi makuziwe nezinhlelo zokuhlenga amabhizinisi amancane emuva kokuthi ucwaningo luveze ukuthi awu-55 000 azovalwa ngenxa yeCovid-19.
I-NPC yenze lesi siphakamiso emhlanganweni obungeledlule lapho uKhomishana wayo uDkt Thami Mazwai ethe amabhizinisi amancane awumgogodla womnotho ngakho kufanele abhekelwe.
Uthe ucwaningo lwabo nezinkampani ezicwaninga ngamabhizinisi amancane luthole ukuthi izinkampani eziwu-55 000 zikhahlamezeke kakhulu.
Uveze ukuthi akusiwo umsebenzi kahulumeni kuphela ukuhlenga amabhizinisi amancane kodwa abatshalizimali abazimele nabo kufanele balekelele, amabhange, izinyunyana nomphakathi wonkana.
Uthe osomabhizinisi abancane kufanele banikwe amathuba ezinxanxatheleni zezitolo, kuthuthukise ingqalasizinda abasebenza kuyona, kugxilwe nasekuvuseni umnotho wasemalokishini.
“Izwe kufanele lihlele kabusha umkhakha womhlaba wokuthengisela, kwehliswe nerenti ukuze osomabhizinisi abancane bakwazi ukungena kulo mkhakha. Sesifikile isikhathi sokuthi kube nemithetho ezwelana nosomabhizinisi abancane. Sidinga uhulumeni, amabhange nabatshalizimali abazimele baxhase osomabhizinisi abancane ngemali ezobasiza ukuthi basebenzise ubuchwepheshe besimanje ukuthuthukisa izinkampani zabo,” kusho uMazwai esitatimendeni.
Uthe kube nohlelo lokubonelela osomabhizinisi abancane uma benza kahle emkhakheni ehlukene.
Uveze ukuthi u-92% wamabhizinisi amancane akuthola kunzima ukusebenza.
Uthe ucwaningo luthi abantu abawu423 500 abaqashwe wosomabhizinisi abancane bazophelelwa wumsebenzi ngenxa yeCovid-19.