Varkworsies in spek
Varkvleis – veral varkvleis met ’n rokerige smaak – hou van soet smake en pas daarom ook baie goed by soet groente, soos botterskorsie. Koop lekker groot varkworsies van goeie gehalte vir hierdie resep.
1 pak (250 g) repiespek 100 ml vrugteblatjang 10 groot varkworsies Olyfolie Sout en vars gemaalde swartpeper
Voorverhit die oond tot 190 °C en voer ’n bakplaat met foelie uit. Smeer ’n dun lagie blatjang op elke repie spek en draai elke varkworsie in ’n repie spekvleis toe. Maak seker die kant van die spek waarop die blatjang ge- smeer is, is teen varkworsie. Pak die varkworsies op die uitgevoerde bakplaat en drup ’n bietjie olyfolie oor elkeen. Geur liggies met sout en peper. Oondrooster vir ongeveer 20 minute of tot die spekvleis bros en die worsies gaar is. Sit die worsies op geroosterde botterskorsie en met mengelslaai voor. Lewer 5 porsies.