30% MEER LAMMERS
Fanie gee toe dat die prosedure vir baie boere nog ’n vreemde konsep is en dat hulle vir die aanvanklike koste skrik. Dit beloop nagenoeg R90 (sinchronisasie plus laparoskopie) per ooi. “Ons het egter telkens gesien boere kom klop aan ons
deur nadat hulle die sukses by hul medeboere gesien het. Ons ervaring is dat boere wat eers een keer die voordele daarvan self ervaar het, dit die volgende jaar weer gaan doen. Dit is meestal mense wat buite die kassie dink, goed na hul vee omsien en voldoende arbeid en voeding het.
“Hoewel die lam van ooie in hokke nie ’n voorvereiste is nie, word dit tog aanbeveel vanweë die groot hoeveelheid meerlinge wat aankom.
Fanie sê vanweë duur arbeidskoste en die ekstensiewe aard van boerdery is laparoskopie nie so gewild in Australië nie. Die Aussie-skaapboerdery is ekstensiewer en met hul bestuurstelsels sal dit moeilik wees om meerlinge op dieselfde wyse as die Jordaans te versorg.
Andrew sr. sê met sy stelsel, waar sowat 8 000 ooie per jaar in lamhokke en op aangeplante weidings lam, het laparoskopie vir hom ’n onontbeerlike bestuurshulpmiddel geword. Ná drie maande skuif die lammers na die veld. “Hoewel die koste betreklik hoog is, vergoed die 30% méér lammers wat gespeen word daarvoor.”
Andrew sê wat hom verbly, is die terugvoering wat hy van voerkraaleienaars kry dat hul Merino-stoorlammers ’n uitstekende groeitempo het en goed met bekende vleisskaaprasse vergelyk.
Nóg ’n voordeel is dat wanneer bepaalde stoetramme puberteit bereik, ’n mens hulle dadelik op die proef kan stel en die onderskeie ramme se nageslag dan beter met mekaar kan vergelyk. Omdat die lammers almal binne ’n kwessie van sewe dae gebore word, is die omgewingtoestande waarin hulle grootword, presies dieselfde. Met normale paring kan die verskil tussen die aankoms van die eerste en die laaste lam tot sewe weke wees.
Elke groep ooie wat met ’n betrokke ram gepaar word en hul lammers kry unieke oorplaatjies.
Andrew sr. sê hy het reeds 30 jaar gelede besef daar is beter maniere as KI om sy kudde te verbeter. “Laparoskopie was vir my die antwoord. Die hoeveelheid lammers wat ek met die prosedure aankry, is reeds só goed dat ek vanjaar nie agterna weer ramme by die ooie vir ’n opvolgdekking gaan sit nie.”