AMERIKANERS SAAI ÁL MEER
Die aantal hektare wat Amerikaanse saaiboere met dekgewasse beplant, het in die afgelope jaar jaar verdubbel. ’n Opname deur Sustainable Agriculture Research and Education (SARE), ’n projek van die Amerikaanse departement van landbou, wys dat die meer as 1 000 respondente verlede jaar gemiddeld 120 ha dekgewasse per plaas aangeplant het. Dit is meer as dubbeld soveel as in 2011. Verlede jaar se opname het gewys: Stoelrog is die gewildste dekgewas. Karmosynklawer was die gewildste peuldekgewas en oliesaadradyse die algemeenste Brassica- tipe dekgewas.
Luidens die opname het boere se mielie-opbrengste ná dekgewasse met byna 2% verhoog, en hul sojaboonopbrengste met byna 3%.
Die jaarlikse opnames toon dat dekgewasse werklik hul staal in moeilike jare wys, sê mnr. Rob Myers, ’n voorligtingsdirekteur van die SARE aan die Universiteit van Missouri.
Dit is veral danksy die grond se verbeterde waterhouvermoë en indringingstempo dat opbrengsverliese weens waterstres verminder, sê hy.
Twee derdes van die respondente het gesê dekgewasse het wisselvalligheid in hul opbrengste weens uiterste weerstoestande verlaag.
Rob sê hulle was taamlik verbaas oor die groot aantal respondente wat gesê het hulle het ’n regstreekse winsvoordeel uit dekgewasse gekry. Altesaam ’n derde het gesê dit het hul winste verhoog, terwyl net 6% gesê het dit het hul winste verlaag. Die res van die respondente het óf geen winsverandering bespeur nie óf het nie genoeg inligting gehad nie.