Trekkers sonder drywers, koeie met honderde kalwers elk, plastiekkoepels wat groot saailande bedek, mielie
plante wat soos klein dennebome lyk . . .
“Die jaar 2000” het die toekoms self versinnebeeld. Só voorspel Landbouweekblad in die 1960’s
oor boerdery en die huishouding.
1960 Só lyk die kookeenheid van die jaar 2000. Maaltye sal binne ’n paar sekondes voorberei word. Huishoudelike sloerwerk sal nie meer bestaan nie. Daar sal geen afstoffery wees nie, geen opwassery, geen gekook, geen gestaan voor hittige stowe nie, ook geen daaglikse of selfs weeklikse inkopies nie. Ons kleindogters sal nie eens meer ’n koppie tee vir hulself hoef te maak nie. Sy sal haar hele huishouding met ‘n skakelbord beheer. Deur net te sit en knoppies druk, sal sy haar wasgoed kan doen, die vloere kan was, afdroog, kos kan koop, die kinders kan dophou en musiek in enige kamer speel.
— CARINA LANDMAN
1968 In die jaar 2000 sal die boer ook ’n ekonoom, landboukundige, chemikus en ingenieur moet wees. Hy sal nie op sy trekker sit nie, maar in beheertorings van waar hy reuse-veeldoelmasjiene deur middel van afstandbeheer sal beveel wat om te doen. Die tradisionele ploeg en trekker sal verdwyn. In die plek daarvan sal landbouskeertuie die grond volmaak bewerk deur dit met ultrasoniese klankgolwe te bombardeer.