Mededingendheid beskerm melkbedryf teen invoer
DIE Suid-Afrikaanse suiwelbedryf is een van die winsgewendste en besbestuurde bedrywe op plaasvlak ter wêreld, maar hy moet hierdie mededingendheid behou om hom teen ingevoerde produkte te beskerm.
Só kan die plaaslike bedryf verseker dat hy voortgaan as produsent van vars en kortraklewe-produkte, het mnr. Basil Doonan, landbouraadgewer van Tasmanië, Australië, op die tiende SA grootkuddekonferensie by Winterton gesê. Hy het al sowat twee jaar in die land deurgebring en het die opdrag om geleenthede vir die Suid-Afrikaanse suiwelbedryf vir die volgende dekade te identifiseer.
Doonan het gesê die bedryf moet munt slaan uit sy vermoë om internasionaal mededingend te wees. Dan kan hy hom teen suiwelinvoer staal en geleenthede vir groei en uitbreiding op die wêreldmark benut wanneer geleenthede opduik. “Die sterk punt van die plaaslike suiwelbedryf is die vermoë van sy goed opgeleide eienaars en bestuurders, sonder wie dit nie moontlik is om die bedryf se potensiaal vas te vang nie. Voordele is die betreklik lae (maar stygende) grondpryse en die vermoë om groot hoeveelhede voer van ’n hoë gehalte te lewer.”
Regstreeks gekoppel aan die boere se vermoë is die noodsaaklikheid om die volgende geslag te laat groei. “Daar is geen struktuur om dit op ’n internasionale grondslag te doen nie,” het Doonan gesê.
Suid-Afrikaanse boere het die vermoë om winsgewende weidings te lewer en dit met swaar belading te bestuur, maar dit beteken bloot dat een of twee geslagte die proses verstaan. Wat van die volgende geslag? wou hy weet.
Nog ’n bedreiging is dat die Regering die suiwelbedryf nie die erkenning en ondersteuning gee wat sy bydrae tot die ekonomie regverdig nie. Dit is egter ’n probleem wat melkboere ook in ander lande ervaar.