‘SA VRA GEREELD TARIEWE’
SUID-AFRIKA is die land waar die meeste aansoeke om teen stortings tariewe gebring word, aldus mnr. Jim Sumner, die voorsitter van die Amerikaanse raad vir die uitvoer van hoender en eiers (USAPEEC).
Suid-Afrika hef onder meer teen stortings tariewe op bevrore Amerikaanse hoenderstukke aan die been.
Die Kommissie vir Internasionale Handel s administrasie( I ta c) heroorweeg sulke tariewe elke vyf jaar en invoerders kan dan redes daartéén aanvoer. Sumner het egter op ’n onlangse besoek aan Suid-Afrika laat blyk dat hulle moed opgegee het om dit te probeer betwis.
“Ons het aan vorige hersienings probeer deelneem en miljoene dollar aan regskoste bestee, maar ons feite en syfers het op dowe ore geval.”
Die tarief is weer vroeër vanjaar hersien.
“Ons het gesê ons kan nie verder geld in ’n donker, diep gat gooi nie,” het Sumner aan joernaliste gesê.
Hy is onlangs aangehaal dat hy in Brasilië gesê het Suid-Afrika is die mees proteksionistiese mark ter wêreld.
Mnr. David Wolpert, uitvoerende hoof van die Assosiasie van Vleisinvoerders en -uitvoerders (Amie), het op die mediageleentheid gesê in sy nege jaar in die in-en-uitvoerbedryf, was daar sowat elke 18 maande ’n plaaslike sektor wat stappe teen invoerders van stapel gestuur het.
Hy het ook gesê die Regering gebruik tans voëlgriep “as verskoning” om Europese hoender uit Suid-Afrika te hou en dat Amie regstappe daaroor van stapel begin stuur het.
Me. Zelda Sharp van die USAPEEC het gesê dit is belangrik vir ’n land om handelsvennote te hê vir wanneer voëlgriep of ander siektes uitbreek.
WYE MARK
Amerika se hoenderuitvoer na Suid-Afrika is klein vergeleke met hoender van ander lande af, asook vergeleke met wat Amerika na ander lande uitvoer, maar diversifisering is belangrik vir Amerika.
“Ons bedryf se sukses kan toegeskryf word aan sy vermoë om by die mark aan te pas,” sê Sumner. Rusland en China was voorheen Amerika se twee grootste uitvoer bestemmings, maar weens Rusland se sanksies en China se verbod ná die uitbreking van voëlgriep in Amerika het Amerika sy uitvoer na ander lande uitgebrei.
Verlede jaar was sy ses grootste uitvoermarkte Mexiko (21,9%), Hongkong (9,8%), Kanada (6%), Taiwan (5,8%), Angola (4,6%) en Kuba (3,5%).
Suid-Afrika is negende op die lys en val in die kategorie “res van die wêreld”, waarheen 48,5% van Amerika se hoenderuitvoer verlede jaar gegaan het, vergeleke met 36% sewe jaar gelede.
STUKKE AAN DIE BEEN
Sumner het gesê die grootste deel van Amerikaanse hoenderproduksie word in Amerika self geëet, selfs “bruin vleis” en agterkwarte.
In Amerika kan kleinhandelaars borsvleis teen ’n hoër prys as vir agterkwarte verkoop vanweë die gewildheid daarvan.
Sumner sê die agterkwarte wat na Suid-Afrika uitgevoer word, word teen dieselfde prys as in Amerika en enige ander land verkoop. “Ons gee nie enige spesiale afslag aan Suid-Afrika nie.”
Dit behels volgens hom dus nie storting nie, maar Amerika het dié geveg (of dit storting is of nie) 17 jaar gelede verloor nadat die Suid-Afrikaanse bedryf gesê het Amerika verkoop dié stukke plaaslik teen pryse wat laer as produksiekoste is.