Bedryf kry tarief-meevaller
DIE Regering se gesloer om ’n besluit te maak oor die aanpassing van die suiker-invoertarief het die bedryf gedwing om suiker teen ’n onwinsgewende prys uit te voer, terwyl invoerders die mark verswelg met suiker uit lande waar produsente gesubsidieer word, sê die Suid-Afrikaanse Suikervereniging (SASV).
Die vereniging het onlangs misluk in ’n hofaansoek om die Minister van Finansies te dwing om gouer oor die aanpassing te besluit. Van 28 Julie tot 15 September vanjaar was daar geen invoertarief op suiker nie. Op laasgenoemde datum is ’n invoertarief van 213,1c/kg in die Staatskoerant gepubliseer, wat groot verligting vir die bedryf gebring het.
Mnr. Trix Trikan, uitvoerende direkteur van die SASV, sê hulle is bly dat die Kommissie vir Internasionale Handel s administrasie( I TA C ), die Departement van Handel en Nywerheid en die Departement van Finansies op die bedryf se noodkrete gereageer en die invoertarief aangepas het in ooreenstemming met die lae wêreldprys van suiker en die tariefformule.
Die doel van die tariefstelsel vir suiker wat na die Suider-Afrikaanse Doeane-unie (Sadu) ingevoer word, is daarop gemik om Suid-Afrikaanse en Swazilandse suikerboere en hul buitelandse eweknieë op gelyke mededingende vlak te plaas.
Sadu-produsente is van die wêreld se 20 mededingendste produsente ter wêreld, maar word onderwerp aan bedreigings van invoer uit lande wie se suikerproduksie gesubsidieer word deurdat dié suiker op die wêreldmark verkoop en na Sadu ingevoer word teen pryse wat laer is as die doeltreffendste produsent se produksiekoste.