MULTIPLANT SE GESKIEDENIS
Die MultiPlant-kwekery is in 1947 begin toe mnre. Len en Francois du Toit se oupa, ’n mynwerker en deeltydse boer aan die Wesrand, te veel plantjies vir sy eie boerdery gekweek het en só ’n mark vir groenteplantjies in sy streek ontdek het. Die besigheid het vinnig uitgebrei. Saailinge is met die hand geoes en met oop wortels, toegedraai in nat koerantpapier, per trein die land vol verskeep.
Daarna het Len se ma, Alda, wat die kwekery saam met Len se pa, Leonard, ’n gekwalifiseerde elektro-meganikus, by Alda se pa oorgeneem het, in die 1970’s die Speedling-stelsel uit Amerika ingevoer. Hierdie bekende polistireen-saailaaie, wat vandag nog algemeen gebruik word, het MultiPlant se kapasiteit en die gehalte van sy plantjies drasties verbeter.
In 1997 moes Len sy informasietegnologiestudies prysgee en die besigheid oorneem. Hy het voortgegaan met die Speedling-stelsel.
Hy het met die jare baie blootstelling gekry aan Nederlandse kwekerye, asook Rijk Zwaan, ’n Nederlandse saadmaatskappy wat saad na Suid-Afrika uitvoer.
Deur hierdie netwerk het Len te doene gekry met die kweekblokkiekonsep, asook die enting van groenteplantjies, wat besig is om vir MultiPlant ’n nuwe bemarkingskanaal oop te maak.