INTERNASIONALE LANDBOUNUUS
1 NIEU-SEELAND | Kiwi’s katvoet vir GM
Die meeste politieke partye in Nieu-Seeland is ten gunste daarvan dat die huidige moratorium op GM gewasse in plek bly weens “mislukkings” van GM-tegnologie in ander lande en die voortgesette vraag na GM-vrye gewasse. Dit is volgens ’n opname deur die organisasie Science Media Centre. Nieu-Seeland se Groen Party is heeltemal gekant daarteen en wil hê selfs ingevoerde kos wat GM bestanddele bevat, moet as sodanig geëtiketteer word. Die Arbeidersparty stem saam, maar sal die finale besluit aan die land se owerheid vir omgewingsbeskerming oorlaat. Die enigste party wat hoegenaamd ten gunste van GM gewasse is, is New Zealand First en selfs dié party sal die inbring van GM sade goedkeur mits dit “met uiterste omsigtigheid” en“in veilige laboratorium toestande” gedoen word. — The Scottish Farmer
2 NEDERLAND | Koolstof bly konstant
Die wêreldwye produksie van koolstofdioksied het verlede jaar staties gebly. China en Amerika, die lande ter wêreld wat die meeste van dié kweekhuisgas vrystel — naas Indië — het dieselfde hoeveelheid of minder van dié gas vrygestel, volgens die Nederlandse Omgewings assesserings agentskap. Tog is daar verlede ja arme eras 35 miljard ton koolstofdioksied in die atmosfeer vrygestel. Verder het die produksie van ander kweekhuisgasse, hoofsaaklik metaangas wat beeste afskei en gaslekkasies as deel van olie- en gas-eksplorasie, met 1% gestyg. Die afplatting in die vrystellings vlakke van kweekhuisgasse het ook in 2014 en 2015 plaasgevind, maar is ongehoord in ’n tyd van wêreldwye ekonomiese groei. — The Guardian
3 KATAR | Hoenders in die woestyn
’n Lank beloofde hoenderplaas het hernude momentum gekry weens onmin tussen Katar en sy buurlande, wat kos-invoer na hierdie land ernstig bemoeilik. Die maatskappy Dar Al Rayan sê die kompleks sal ’n produksievermoë van 70 000 ton hoendervleis en 250 miljoen eiers per jaar hê. Die plan is om nie net ’n pluimveeplaas te vestig nie, maar ook ’n “hele ekostelsel wat die produksie van binnelandse pluimveeprodukte ondersteun”, soos voerfabrieke, die produksie van onverwerkte materiaal om dié voer mee te maak en ander stappe, wat die vestiging van kleiner pluimveeplase sal aanmoedig. Hierdie planne is reeds in 2014 aangekondig, maar is toe vroeg in 2015 uitgestel te midde van kostebesnoeiings deur die staat. Sedert Saoedi-Arabië, Egipte, die Verenigde Arabiese Emirate en Bahrein in Junie weens politieke kwessies toestemming vir die invoer van kos na Katar weerhou, moet die land dringend selfversorgend word. — Doha News