HOE GEMAAK MET ONKRUIDDODERDOELTREFFENDHEID IN OESRESTE?
Een van die probleme wat boere in die verlede met skyfplanters ondervind het, is dat die bekamping van onkruid swakker was omdat die planters nie onkruiddoders, soos trifluralien, so goed kan inkorporeer soos tandplanters nie.
Met “nuwe” onkruiddoders, soos Sakura (reg.nr. L9082, Wet 36 van 1947) en Boxer Gold (reg.nr. L8222), is inkorporering nie meer ’n vereiste nie.
“Ons weet hoe belangrik grondbedekking vir vogbewaring, grondlewe en die vermindering van erosie is, maar so ’n dik stoppelkombers op die grond kan onkruiddoder onderskep voordat dit op die grond kom, en die doeltreffendheid daarvan verlaag,” sê dr. Ken Flower van die Universiteit van Wes-Australië in Perth.
Mnr. Yaseen Khalil van die Universiteit van Wes-Australië het navorsing gedoen oor wat met onkruiddoders gebeur waar dit op lande met 4 ton oesreste per hektaar gespuit word.
Hy het gekyk of onkruiddoders, soos trifluralien, piroksasulfoon (Sakura) en prosulfokarb-metolaklor (Boxer Gold), raaigras kan bekamp nul, sewe en 14 dae ná reën en of die hoeveelheid reën ’n invloed op hul werking het.
Sy navorsing toon dat die meeste onkruiddoders met reën in die grond geloog het. Die verskil was nie baie groot nie: 5 mm was amper so goed soos 20 mm. Hoe gouer dit reën nadat die onkruiddoder toegedien is, hoe beter die werking.
Die intensiteit van die reën het nie ’n verskil gemaak nie.
Ken sê Yaseen het gevind dat Sakura die geskikste onkruiddoder vir lande met dik oesreste is.
“Sakura kan minstens 14 dae op die oesreste aktief bly om raaigras te bekamp.”
Boxer Gold het geen uitwerking gehad ná 14 dae nie, en resultate met trifluralien het baie gewissel, maar dit werk beter as dit gou ná toediening reën.
Minder onkruiddoder het uitgeloog as dit op droë stoppels toegedien is as op nat stoppels.