VRAAG NA HEUNINGBOS GROEI
Die meeste heuningbos wat geoes word (tot 80%), kom uit die veld.
Die tee groei in die suide van die Oos- en Wes-Kaap.
Mnr. Eugene Smith, voorsitter van die Suid-Afrikaanse Heuningbostee-assosiasie (SAHTA), sê op talle plase waar die plante vir tee geoes word, boer boere dus nie werklik met heuningbos nie. Hulle verwelkom wel die bykomende inkomste wat hulle sodoende verdien.
Min syfers is volgens hom beskikbaar, maar na raming is daar tot 20 boere wat op ’n taamlike groot skaal heuningbos aanplant en baie meer wat dit op klein skaal doen.
Sowat 700 ton heuningbos word na raming per jaar geoes. Dit lewer sowat 350 ton tee op.
Die SAHTA gee nou baie aandag daaraan om die bedryf na aangeplante heuningbos te laat beweeg omdat daar geen groeipotensiaal meer in die oes van heuningbos in die natuur is nie, sê Smith.
Laasgenoemde bly egter ’n voorrangsaak, waaronder dat dit volhoubaar gedoen word.
Smith sê die verwerking van die oes verg ’n gespesialiseerde proses en bepaal die smaak van die tee.
Die meeste heuningbostee word danksy goeie uitvoerpryse uitgevoer. “Die vraag na heuningbostee is baie groter as die aanbod, veral omdat dit as ’n kafeïenvrye gesondheidsdrankie bekend staan.
“Baie van die gesondheidsaansprake is egter nog nie wetenskaplik bewys nie omdat dit vir so ’n klein bedryf te duur is om die navorsingskoste te kan dra,” sê Smith.