Opleiding
Duisende jong mense het na Nampo gestroom en personeel van die Universiteit van die Vrystaat moes bontstaan om voornemende studente se vrae te beantwoord. Dr. Antonie Geyer was daar en vertel meer oor die studiegeleenthede aan dié universiteit.
Leer en studeer is nie net bedoel vir skoolverlatersnie.Talleboerehet al later in hul lewe die boeke nader getrek om hulself beter te bekwaam en om navorsing te doen.
Dr. Antonie Geyer, direkteur van landbou-ontwikkeling aan die Universiteit van die Vrystaat (UV), sê die spektrum van studieen loopbaankeuses strek wyd.
“Die universiteit bied alles van plant- en dierekunde tot landbou-ekonomie aan. Die landbou- sektor bied ’n hawe vir diegene wat self eendag wil boer, maar ook vir diegene wat navorsing wil doen, in ’n laboratorium wil werk of ekonomiese neigings in die landboumark wil ontsyfer. Daar is gevolglik baie keuses.”
Die UV bied verskeie landbougerigte kursusse en graadprogramme aan. Die fakulteit van natuur- en landbouwetenskappe bied meer as 160 internasionaal geakkrediteerde voorgraadse en nagraadse kwalifikasies in verskeie vakgebiede aan. Danksy die verskeidenheid keuses wat studente binne die landbouwetenskappe kan uitoefen, is vakkeuses wat op spesialiskwalifikasies binne die landbousektor toegespits is, ook moontlik.
Gespesialiseerde nagraadse kwalifikasies in vakgebiede, soos plantwetenskap en volhoubare landbou, is ook vir gegradueerdes beskikbaar.
OORBRUGGING
Die UV bied landbou-opleiding oor ’n breë spektrum aan. Twee oorbruggingskursusse is beskikbaar vir leerders wat aanvanklik nie aan die akademiese vereistes vir hoofstroomopleiding aan die universiteit voldoen nie, naamlik ’n voorbereidingsprogram om gereed te maak vir universiteit en ’n verlengde graadprogram.
TOEKOMS
Die toekoms van landbou-opleiding by die UV is dinamies en opwindend, en die relevansie van toegepaste landbou-opleiding moet verseker word. Baie beplanning word gedoen om te verseker dat landbou-opleiding geskik is vir die bedryf en die praktyk. Dit sluit in:
■ Die daarstelling van ’n landbou-adviesraad is in die finale fase van goedkeuring.
■ By die UV word landbou in die eerste jaar parallel in Afrikaans en Engels aangebied.
■ ’n Landbougraad vir landbouskoolonderwysers is in die finale fase van beplanning.
■ ’n Praktiese jaar vir gegradueerde studente, soos ’n internskap, word beoog.
■ ’n Nuwe spesialiskursus in landbouvoorligting word van vanjaar af aangebied.
HOOFVAKKE
Met ’n groot verskeidenheid landbougrade in die wetenskap, landbou-ekonomie en bestuur wil die UV die voorkeurkeuse wees vir enige voornemende student wat ernstig is oor landbou-opleiding. Die UV, met sy gevestigde grade en kundigheid, word reeds in Suid-Afrika as ’n top-universiteit vir landbouwetenskaplike studies gereken.
Hier volg ’n opsomming van die verskillende hoofvakke en kombinasies van vakke binne ’n betrokke graadkursus. WETENSKAP
Landbou-opleiding in die wetenskap staan bekend as die B.Sc.Agric.-graad. Dit is ’n vierjaar-graadkursus waarby die honneursgraad ingesluit is. Ná die verwerwing van hierdie professionele B.Sc.-graad, word dit opgevolg met ’n M.Sc.-graad. Die UV bied sewe hoofrigtings vir die B.Sc.-graad aan (sien TABEL 1 op bl. 82). LANDBOU-EKONOMIE
Die opleiding in landbou-ekonomie spesialiseer in twee grade (sien TABEL 2 op bl. 82).
’n B.Sc.-graad in landbouekonomie kan binne drie jaar verwerf word sonder chemie en fisika in die eerste jaar. Wiskunde en statistiek is wel belangrike vakke. Die kern van hierdie kwalifikasie is landbou-ekonomie en statistiek. Dit word met ’n B.Sc.-honneursgraad in land- bou-ekonomie opgevolg.
Die B.Agric.-graad in landbou-ekonomie is ’n driejaarkursus wat met ’n B.Agric.honneursgraad in landbou-ekonomie opgevolg word. Dit is ’n handelsgeoriënteerde graad met landbou-ekonomie en -bestuur as die kern van die kursus. BESTUUR
Landbou-opleiding wat in bestuur spesialiseer, staan as die B.Agric.-graad bekend. Spesialisasie in bestuur bied sewe opsies om van te kies (sien TABEL 3 op bl. 82).
VERDERE STUDIES
Die UV bied verskeie nagraadse studie- en diplomakursusse aan.
■ Honneurs. Die honneursgrade word heeltyds vir ’n minimum tydperk van een jaar aangebied. Dit is slegs van toepassing op die graad B.Sc.Agric. waar die honneursgraad in die vierde jaar van die kursus aangebied word.
■ Diplomakursus. Die UV Sentrum vir Volhoubare Landbou bied ’n gevorderde diplomakursus oor 18 maande in volhoubare landbou en landelike ontwikkeling aan. Die sentrum word gereken as die kern van voorligtingsnavorsing en -opleiding in die Suider-Afrikaanse Ontwikkelingsgemeenskap. Twee nagraadse kwalifikasies, naamlik ’n jaar lange nagraadse diploma en ’n jaar lange meestersgraad-
kwalifikasie in volhoubare landbou, word aangebied. Albei jaarkursusse sluit die kerngebiede van die bestuur van natuurlike hulpbronne, landbou-ekonomie, die reproduksie en landbouvoorligting in. ’n Doktorsgraad in volhoubare landbou word ook aangebied. Die sentrum het ’n trotse geskiedenis van gegradueerdes wat die program voltooi het en die uitdagings van moderne landboutoestande suksesvol trotseer. Die leerplan word deurlopend geëvalueer en aangepas wanneer nodig om in te skakel by ’n voortdurend veranderende landbou-omgewing. Groot klem word gelê op tegnologie, bestuursvaardighede e nom studentes e denkpro- sesse te verbeter. Die resultaat is beter afgeronde beroepslui wat gesog is in die openbare en private landbousektor.
■ Nagraadse diploma. Die Sentrum vir Omgewingsbestuur bied ’n nuwe nagraadse diploma (een jaar) in geïntegreerde waterhulpbron bestuur aan. Die sentrum bied ook sedert 1994’ n suksesvolle meesters graadkursus in omgewings- bestuur aan. Aansoeke vir hierdie programme vir 2019 se akademiese jaar sluit op 30 September 2018. Besoek die Sentrum vir Omgewingsbestuur se webwerf by www.ufs. ac.za/cem vir nog inligting.
■ Nog programme. Die Disaster Management Training and Education Centre for Africa bied ’n nagraadse diploma in rampbestuur, ’n meestersgraad in rampbestuur, en ’n Ph.D. in rampbestuur aan.
DOEN SÓ AANSOEK
Maak jou eerste keuse die regte keuse. Besoek www.ufs.ac.za vir die volledige lys van graadaanbiedinge in die fakulteit natuur- en landbouwetenskappe. Volg die “How to apply”-skakel op die webwerf om die proses te begin.
Hou elektroniese afskrifte van die volgende dokumente byderhand: ■ Jou identiteitsdokument of paspoort (asook dié van jou ouers as jy jonger as 18 jaar oud is). ■ Jou finale gr. 11-uitslae, asook jou gr. 12 Junie-rapport met die skoolstempel daarop. ■ As jy ’n student by ’n ander instelling is, moet jy ook jou bestaande akademiese rekords insluit.