BELOFTES, BELOFTES

Pres. Cyril Ramaphosa sal volgens adj.pres. David Mabuza eersdaags ’n paneel aanstel om alle bewerings van korrupsie met die restitusieproses te ondersoek. Hy het dié aankondiging in die Nasionale Vergadering gemaak. Dit volg op die bevinding van die onafhanklike hoëvlakpaneel onder leiding van oudpres. Kgalema Motlanthe dat korrupsie dalk voorgekom het toe die Mala-Mala-grondeis in Mpumalanga in 2013 vir meer as R1 miljard geskik is, asook die Departement van Landelike Ontwikkeling en Grondhervorming se erkenning verlede jaar dat hy 85 gevalle van bedrieglike grondeise ondersoek.