BOEREPLAN DRA HOM DEUR DIE DROOGTE
DANKSY ’n paar groot projekte om toerusting vir kleinboere te vervaardig, kon ’n boer in die distrik Bultfontein vanjaar sy planter in die skuur laat staan en boonop werk aan 30 mense verskaf.
“Dit is ’n lekker trotse storie om te kan vertel,” sê mnr. Michris Janse van Rensburg, die brein agter en eienaar van Backsaver-plaastoerusting, wat onder meer kunsmistoedieners en minimumbewerkingplanters vir kleinboere ontwerp en verkoop.
Janse van Rensburg is een van die verskaffers van toerusting en produksiemiddele aan Graan SA se kommunale projek in die OosKaap. Ander verskaffers sluit in Kynoch, Monsanto, SA Kalk en Gips, Villa Crop Protection en Syngenta.
“Michris se kunsmistoediener vorm deel van ons projek om die bestaansboere in die Oos-Kaap se kommunale gebiede te help om selfonderhoudend te word,” sê mnr. Luke Collier, bestuurder van Graan SA se streekkantoor op Kokstad. Die projek word met die samewerking van die Jobs Fund van die Tesourie bedryf. Tans word 7 500 ha van ongeveer 5 000 boere beplant.
OPLEIDING
Collier verduidelik dat elke kleinboer ongeveer R3 500 van die insetkoste van R7 300 per ha bydra, met die res van die bedrag wat deur die projek betaal word. Graan SA werf dan insette en toerusting op kommersiële standaard, soos bastersaad, chemikalieë, kunsmis en toedieningstoerusting, asook kontrakteurs vir grondbewerking, om vir die boere te plant en te oes.
Hy sê die boere gebruik self die toerusting wat deur Janse van Rensburg gemaak word. Só leer hulle om, saam met hul mentors, op die lande daarmee te werk. Die boere kry ook regdeur die groeityd praktiese en teoretiese opleiding.
“Die boere volg prosesse soortgelyk aan kommersiële boere tot met oestyd,” sê Collier. “Hulle sal dan op hul eie bene kan staan wanneer die projek, wat vyf jaar sal duur, afgehandel is.”
BESPAAR TYD
Janse van Rensburg sê die kunsmistoedieners kan “die vinnigste en doeltreffendste waarde toevoeg vir die boere”.
“Kunsmistoediening met die hand is ’n groot probleem vir kleinboere, want elke ou se handgrootte en loopspoed verskil. Die mentors kry dit nie eens reg nie.”
Collier sê die kunsmistoediener bespaar baie tyd vir die kleinboere, omdat van hulle kunsmis met ’n teelepel strooi, wat baie moeilik is in die lande waar die minimum plantestand 30 000 mielieplante per hektaar is.
“Dit kon maklik twee tot drie dae duur. Met die kunsmistoediener duur dit slegs ’n paar uur.”
WERK VERSKAF
Janse van Rensburg, wat naby Bultfontein boer, sê hy het weens die droogte in dié distrik nie vanjaar geplant nie. Hy is dankbaar hy kon danksy dié projek en nog een in Uganda dié besluit neem, “anders was ek dalk onderdeur”.
Hy kon aan nagenoeg 30 mense werk verskaf oor die feestyd, en ook ekstra werk aan ander ondernemings op die dorp wat vir hom onderdele vervaardig het. Hy het altesaam 326 kunsmistoedieners vir die projek vervaardig.
Collier sê hulle beoog om tydens die verloop van die res van die projek kunsmistoedieners aan al Graan SA se bestaansboere in die Oos-Kaap te verskaf. Met die samewerking van Janse van Rensburg wil hulle ook vir die boere ’n mikrosproeier ontwerp en vervaardig.
Die toedieners sal eers by Kokstad getoets word, voordat besluit sal word om dit na die res van die Oos-Kaap te versprei.