Bedryf verkry terroirkompetisie

DIE spesialis-wynkompetisie waar wyne volgens terroir beoordeel word, sal voortaan onder die vaandel van die SA Nasionale Wynskouvereniging (SANSWA) aangebied word.

Die Novare SA Terroir-wyntoekennings is die nuutste toevoeging tot die SANSWA, wat ook die SA Jongwynskou en Veritas aanbied.

Die kompetisie bekroon wyne wat spesifieke verskille in gronden klimaatsfaktore in verskillende gebiede na vore bring. Slegs wyne wat gesertifiseer is as Wyn van Oorsprong (WO) van ’n enkelwingerd, landgoed, wyk of distrik (met nie meer as een wyk nie) mag deelneem.

OOREENKOMS

Volgens mnr. Christo Pienaar, voorsitter van die SANWSA, het die organisasie al 14 jaar gelede ’n ooreenkoms met mnr. Marius Labuschagne, stigter van die SA Terroir-toekennings, gesluit om die kompetisie oor te neem.

Labuschagne, ’n oud-wynjoernalis en mediakonsultant, het in 2005 ’n geleentheid raakgesien om die kompetisie te begin.

“Die WO-skema is deel van Suid-Afrika se wynstelsel en wynkultuur. Daarom was dit my natuurlike keuse dat die Novare SA Terroir-wyntoekennings aan die bedryf as alleeneienaar oorgedra word.”

Labuschagne sê dat SuidAfrika een van die voorste oorsprongstelsels ter wêreld het. “Daarom is dit geskik dat hierdie kompetisie deel van die bedryf word.”

Novare gaan sy borgskap van die kompetisie in vennootskap met die SANWSA voortsit.