Hart tot hart

Enige bedryf sonder ‘I believe’ is maar ’n droewige affêre.

In die woonbuurt waar ek soggens stap om my koerant te gaan koop, sien ek gereeld ’n vissersboot wat langs die pad geparkeer staan. Die boot se naam is in groot, rooi letters teen sy linkerkant geverf: “I believe.” Dit het my nuuskierigheid erg geprikkel. Dis glad nie ’n onvanpaste naam vir ’n kleinerige boot wat die Weskussee sy jagveld gemaak het nie, dink ek by myself, maar ek bly wonder wat die eienaar se motivering was vir dié gepaste naam. Dalk is hy ’n eenvoudige, gelowige man wat weet dat boothengel in die onbarmhartige see beslis nie vir sissies is nie.

Daar is so baie dinge wat verkeerd kan loop. Mislukking, teleurstelling en gevaar is altyd daar om jou pad te kruis. Wanneer die stuurman soggens “I believe” se neus in die koue water stoot, weet hy nie of die vis gaan byt nie.

Onlangs loop ek toe die eienaars van die boot raak. Jokkie en Marinda is in beheer van hul eie viswinkel hier naby en hulle is werksaam in die bedryf.

By Marinda wil ek toe weet: “Waar kom hierdie naam van jul boot vandaan?” Met ’n breë glimlag verduidelik sy: “Op Jacobsbaai is ’n sekere oom Baard wat ook daar doenig is. Wanneer mense soms vir hom vra of die vis gaan byt, lig hy sy skouers en antwoord graag: ‘I believe.’” Toe Marinda-hulle later die boot kies, was die naam klaar gekies en van doop bedien: “I believe”! Voor ek loop, laat Marinda my verstaan dat daar vir hulle ook iets meer in die naam steek. Vir hulle is daar ’n stukkie getuienis, want enige bedryf sonder “I believe” is maar ’n droewige affêre.

En hoe waar is dit nie! Voordat jy volgende keer uitgaan om jou dagtaak te gaan verrig, gaan eers op jou knieë en sê vir Een wat oor jou lewe en lotgevalle beskik: “I believe.”